დირექტორის მისალმება

ძვირფასო ბავშვებო, პატივცემულო კოლეგებო, მშობლებო!

წლევანდელი წელი განსაკუთრებულია “ევროპული სკოლისთვის“ – სკოლა დაარსებიდან 10 წელს აღნიშნავს!

ეს წლები ძვირფასია თითოეული ევროპულ სკოლელისთვის. დიახ, ჩვენ სწორედ ასე ვუწოდებთ “ევროპული სკოლის“ მოსწავლეებს, მათ მშობლებს, პედაგოგებს, ყველას, ვინც  გულშემატკივარია “ევროპული სკოლისა“ და ვინც ჩვენთან ერთად ზრუნავს ახალგაზრდა თაობის აღზრდაზე, ვისთვისაც ძვირფასია მათი მომავალი!

ეს 10 წელი თვითდამკვიდრების, ძიების და, რასაკვირველია, დიდ წარმატებათა წლები იყო.  “ევროპულმა სკოლამ“  მოიპოვა ღირსეული ადგილი, არა მხოლოდ ქართულ, არამედ საერთაშორისო საგანმანათლებლო სივრცეშიც. “ევროპული სკოლის“ კურსდამთავრებულთა  ჩარიცხვები და მათი წარმატება ეროვნულ თუ მსოფლიოს პრესტიჟულ უმაღლეს  სასწავლებლებში  დასტურია სკოლის დიდი ავტორიტეტისა და მაჩვენებელია  იმ გზის სისწორისა, რომელსაც “ევროპული სკოლა“ უკვე 10 წელია ადგას.

წლეულს სკოლა  გაზრდილი, გაფართოებული შენობით, შეცვლილი ინფრასტრუქტურით, გალამაზებული ინტერიერითა და თანამედროვე ტექნოლოგიებით აღჭურვილი კაბინეტ-ლაბორატორიებით ხვდება ახალ სასწავლო წელს, მაგრამ მხოლოდ ეს არ არის სიახლე: “ევროპული სკოლის“ გუნდი განახლებული შემადგენლობითა და ახალი ხედვით, ახალი ადმინისტრირებით  და რეორგანიზებული სტრუქტურით, ახალი დეპარტამენტებითა და სერვისებით ეგებება ახალ სასწავლო წელს. ჩვენს მოსწავლეებს ვთავაზობთ თანამედროვე სწავლების ინოვაციურ მეთოდებს, რომლებიც შემუშავებულია მაღალკვალიფიციური პედაგოგებისა და სპეციალისტების მიერ ეროვნული და საერთაშორისო პროგრამების შერწყმისა და უნივერსალიზაციის გზით, რაც მიმართულია სწავლების ხარისხის ამაღლებისა და სრულყოფისკენ.

“ევროპული სკოლა“  არ ცვლის არჩეულ გეზს. ის კვლავ ეროვნული იდენტობის დაცვით მიდის განახლებული გზით ევროპისაკენ; გზას, უკვე გაკვალულს თავისი ათწლიანი ისტორიის მანძილზე, “ევროპული სკოლა“ მყარი, გონივრული, თავდაჯერებული და მტკიცე ნაბიჯებით განაგრძობს!

გილოცავთ! უამრავი სიხარულისა და წარმატების მომტანი ყოფილიყოს ახალი სასწავლო, 2017-18 წელი თითოეული თქვენგანისთვის და ჩვენი დიდი ოჯახის – “ევროპული სკოლისათვის“!

სოფიო ბაზაძე

ევროპული სკოლის აკადემიური დირექტორი