სიახლეები და ღონისძიებები

სიახლეები

Secret Santa

12 Jan 2019

”ევროპული სკოლის” თითოეულ თანამშრომელს 28 დეკემბერს გადაეცა სკოლის ადმინისტრაციის მიერ სპეციალურად მომზადებული საახალწლო საჩუქრები, მოგვიანებით კი თანმშრომლები სკოლის სააქტო დარბაზში შეიკრიბნენ Secret Santa-ს საჩუქრების მისაღებად. საჩუქრების გახსნის და Secret Santa-ს გამოცნობის პროცესი სახალისო აღმოჩნდა თითოეული მოთამაშისთვის და მისცა საშუალება თანამშრომლებს, უფრო უკეთ გაეცნოთ ერთმანეთი.

კურსდამთავრებულთა შეხვედრა

12 Jan 2019

29 დეკემბერს “ევროპულ სკოლაში“ ჩატარდა კურსდამთავრებულთა შეხვედრა. შეკრებამ საშუალება მისცა კურსდამთავრებულებს, ჩართულიყვნენ საქართველოს წითელი ჯვრის საზოგადოების საქველმოქმედო კამპანიაში - ”აჩუქე სითბო”. ღონისძიებას უძღვებოდნენ კურსდამთავრებულთა ასოციაციის ყოფილი და მომავალი პრეზიდენტები: ირაკლი კიკორია და ნანუკა გოგუაძე. მათ შეაჯამეს გასული წლების აქტივობები და მომავლის გეგმები გაუზიარეს დამსწრე საზოგადოებას. ცივმა ამინდმა, მაგრამ თბილმა გრძნობებმა, ცხელმა შოკოლადმა, საახალწლო განათებამ , პარაორკესტრის შეზღუდული შესაძლებლობების მქონე მოზარდთა მუსიკალურმა ნომრებმა, სულ სხვა ელფერი შესძინა საღამოს, რომელშიც დიდი ენთუზიაზმი ჩადო ”ევროპული სკოლის” კურსდამთავრებულთა ასოციაციამ სკოლის საზოგადოების დანარჩენ წევრებთან ერთად.

საახალწლო საჩუქრები იაშვილის კლინიკისათვის

30 Dec 2018

სანამ არდადაგები დაიწყებოდა, ბავშვებმა, მშობლებმა და მასწავლებლებმა PYP-ს მიერ ორგანიზებული საქველმოქმედო აქციისთვის გააკეთეს შემოწირულობა. ჩვენ მოვამზადეთ საჩუქრების შეკვრა ტკბილეულით, საკანცელარიო ნივთებითა და ტანსაცმელებით. ყველა ამ საჩუქრით, მივედით იაშვილის ბავშვთა კლინიკაში და გადავეცით ისინი ლეიკემიით დავადებულ ბავშვებს. ისინი ძალიან გახარებულები იყვნენ და დიდი მადლობა გადაუხადეს ევროპული სკოლის მოსწავლეებს. ერთად ჩვენ ვქმნით ჩვენს სიხარულით და სიყვარულით სავსე მომავალს!

სათამაშოები საჩუქრად წეროვანის სკოლისათვის

27 Dec 2018

ამერიკული სექტორის მე-11 კლასის მოსწავლეებმა ქველმოქმედებაში საკუთარი წვლილი შეიტანეს - ევროპული სკოლის მასშტაბით, მათ შეაგროვეს სათამაშოები და წეროვანში გაემგზავრნენ, სადაც საკუთარი ხელით გადასცეს ეს სათამაშოები სკოლას. წეროვანში მოსწავლეებთან ერთად მათი მასწავლებლები- ანა ხუციძე, ბესო კიკნაძე და თამარ ჭაღიაშვილი ჩავიდნენ. მათ დაათვალიერეს სკოლის ინფრასტრუქტურა , ბიბლიოთეკა, სპორტული დარბაზი და კომპიუტერების ოთახი. მოსწავლეები სკოლის დირექტორსაც გაესაუბრნენ და სკოლაში არსებულ პრობლემებს გაეცნენ. მათ გადაწყვიტეს, წეროვანის სკოლას შემდგომშიც დაეხმარონ და მისი ბიბლიოთეკა ახალი და საინტერესო წიგნებით გაამდიდრონ.

Microsoft-ის ტრენინგი

27 Dec 2018

26 დეკემბერს ევროპულ სკოლაში ჩატარდა Microsoft-ის ტრენინგი პედაგოგებისთვის საგანმანათლებლო ტექნოლოგიების გამოყენების მიმართულებით. Microsoft საქართველოს წარმომადგენლობამ, განათლების ბიზნეს განვითარების მენეჯერის, დავით ჭიაბერაშვილის მხარდაჭერითა და დახმარებით, სკოლის პედაგოგებისთვის შეარჩია ტრენინგის სპეციალური კურსი. ტრენინგი მოიცავდა სამ მნიშვნელოვან მიმართულებას: OneNote app-ის გამოყენება სასწავლო პროცესში, Microsoft Teams-ის გამოყენება გუნდური მუშაობისთვის და კოდირება Minecraft-თან ერთად. ტრენინგი აპლიკაციების გამოყენებასთან ერთად სწავლების მეთოდოლოგიასაც მოიცავდა, რაც პრაქტიკულ მუშაობაში აისახა. სწავლების თანამედროვე მეთოდების დანერგვაში Microsoft-ის ხედვა ტექნოლოგიების გამოყენების მიმართულებით ყოველთვის მნიშვნელოვანი იყო და არის ევროპული სკოლისთვის.

საახალწლო არტ ვორქშოპი

26 Dec 2018

ევროპული სკოლის ხელოვნების დეპარტამენტმა სკოლის მასწავლებლებისა და ადმინისტრაციისათვის ჩაატარა საახალწლო ვორქშოპი. საახალწლო თემატიკის ნამუშევრების შექმნის პროცესში მონაწილეებმა გამოავლინეს მათი კრეატიული უნარები და მხიარულად გაატარეს დრო. ვორქშოპის მონაწილეები თავადაც სასიამოვნოდ გაკვირვებულები დარჩენენ მათი შრომის საბოლოო შედეგით და დიდი სურვილი გამოთქვეს, უახლოეს მომავალში კვლავ დაიგეგმოს მსგავსი აქტივობები.

კურსდამთავრებულთა შეხვედრა

26 Dec 2018

მოუთმენლად ველით ჩვენს კურსდამთავრებულებთან შეხვედრას ამ განსაკუთრებულ დღეს!

საახალწლო წარმოდგენა “მაკნატუნა”

26 Dec 2018

26 დეკემბერს ევროპული ბაღის პატარა მაკნატუნებმა მათ მშობლებსა და მასწავლებლებს ჯადოსნური წარმოდგენით მიულოცეს შობა-ახალი წელი.  სტუმრად თოვლის ბაბუაც გვეწვია. პატარებმა ბევრი იმღერეს, იცეკვეს და იმხიარულეს.

ფილმის "ერთხელ თბილისში ან ათასი წლის შემდეგ" პრეზენტაცია

23 Dec 2018

23 დეკემბერს ევროპულ სკოლასთან არსებულმა "პუშკინის კლუბმა" (ხელმძღვანელი -ნატალია მიქელაძე) ჩაატარა მხატვრული ფილმის "ერთხელ თბილისში ან ათასი წლის შემდეგ" პრეზენტაცია. პროექტის ავტორები არიან ნატალია მიქელაძე და ელისო ადამია, ხოლო ფილმში მონაწილეობენ პუშკინის კლუბის წევრი მოსწავლეები. პრეზენტაციას ესწრებოდნენ პატარა მსახიობები, მათი მშობლები, სკოლის დირექციის და ადმინისტრაციის წარმომადგენლები და მოწვეული სტუმრები. ფილმმა დამსწრე საზოგადოების დიდი მოწონება და აპლოდისმენტები დაიმსახურა.

საახალწლო ზეიმი "მაკნატუნა ფართი"

23 Dec 2018

შაბათს, 22 დეკემბერს, გაიმართა ევროპული ბაღის გამოსაშვები ჯგუფების საახალწლო ზეიმი "მაკნატუნა ფართი" . არაჩვეულებრივი სანახაობა მოაწყვეს მაკნატუნების ფორმებში გამოწყობილმა პატარებმა. მათ იცეკვეს სპექტაკლის გათანამედროვებულ მუსიკალურ მოტივებზე, იმღერეს საახალწლო სიმღერები და ზღაპრული განწყობა შეუქმნეს დამსწრე საზოგადოებას.

ფაბლაბის პრეზენტაცია დიპლომატიური კორპუსისა და საერთაშორისო ორგანიზაციებისათვის

20 Dec 2018

19 დეკემბერს, ევროპულ სკოლას წილად ხვდა პატივი ემასპინძლა დიპლომატიური კორპუსისა და საერთაშორისო ორგანიზაციებისათვის. ელჩები და წარმომადგენლები საელჩოებიდან და წამყვანი ორგანიზაციებიდან დაესწრნენ სპეციალურად მათთვის გამართულ ინოვაციების ლაბორატორიის პრეზენტაციას. სტუმრებმა საკუთარი თვალით იხილეს ევროპულ სკოლაში ახლადგახსნილი FabLab-ის უნიკალური ტექნიკური და საგანმანათლებლო შესაძლებლობები, რომელიც წარმოადგენს აღმოსავლეთ ევროპაში პირველ პრეცედენტს სკოლის სივრცეში მსგავსი სწავლების მოდელისა. ფაბლაბი აძლევს მოსწავლეებს შესაძლებლობას, ჰქონდეთ ყოველდღიური შეხება უახლეს ტექნოლოგიებთან და შეიძინონ 21-ე საუკუნის უნარ-ჩვევები.

საშობაო გამოფენა

18 Dec 2018

ევროპული სკოლის მოსწავლეთა ნამუშევრების საშობაო გამოფენის გახსნაზე მოწვეული იყვნენ სტუმრები - შოთა რუსთაველის პრემიის ლაურეატი და თბილისის საპატიო მოქალაქე, მხატვარი ქეთი მატაბელი და მოზარდმაყურებელთა თეატრის მთავარი მხატვარი ნინო ჩიტაიშვილი. გამოფენაში მონაწილეობა მიიღეს ქართული სექტორისა და საერთაშორისო ბაკალავრიატის მოსწავლეებმა. წარმოდგენილი იყო შობა-ახალი წლის თემატიკაზე მრავალფეროვანი ტექნიკითა და მასალით შექმნილი ფერწერული თუ გრაფიკული ნამუშევრები, კოლაჟები და კონსტრუქციები.

აკრედიტაციები

პარტნიორები