კლუბები

კალათბურთის კლუბის მიზანია, რაც შეიძლება მეტი ბავშვი ჩაერთოს სპორტულ აქტივობაში, განიტვირთოს გაკვეთილების შემდეგ და გახდეს ფიზიკურად აქტიური. ჩვენთან მოსახვედრად არ არის საჭირო რაიმე გამოცდილება, ვარჯიში შეუძლიათ, როგორც მოყვარულ, ასევე გამოცდილ კალათბურთელებს. “ევროპული სკოლის“ გუნდის მწვრთნელები  არიან ვაკო ადამაშვილი და შოთა ტეფნაძე. მწვრთნელები ვარჯიშის დროს იყენებენ საერთაშორისო სტანდარტების შესაბამის სამწვრთნელო ტაქტიკებსა და მეთოდებს მოთამაშის ასაკისა და უნარების გათვალისწინებით,  ყურადღებას აქცევენ ინდივიდუალური და გუნდური თამაშის უნარების ჩამოყალიბებას, ხელს უწყობენ ჯანსაღი ცხოვრების წესის პოპულარიზაციას სკოლის საზოგადოებაში.

“ევროპულ სკოლას“ ჰყავს კალათბურთის გუნდი,რომელიც მონაწილეობას იღებს სხვადასხვა ტურნირებსა თუ ამხანაგურ შეხვედრებში.

გაკვეთილების დასრულების შემდეგ ჩოგბურთის კლუბი 6-დან 13 წლამდე ბავშვებს ჩოგბურთის გაკვეთილებს სთავაზობს. მწვრთნელები ნინო ნალბანდიანი და კრისტოფერ ჰენეკინი უზრუნველყოფენ მოსწავლეებისთვის უსაფრთხო კლასგარეშე გარემოს შექმნას, რომელსაც ასეთ დიდ მნიშვნელობას ანიჭებენ მშობლები. აღსანიშნავია ისიც, რომ ნინო ნალბანდიანის რამდენიმე მოსწავლე ეროვნული და საერთაშორისო შეჯიბრებების გამარჯვებულიც გახდა. კრისტოფერ ჰენეკინი თხუთმეტ წელზე მეტია წვრთნის მოზარდებს ჩოგბურთში, მათ შორის საფრანგეთში, ავსტრალიაში და აი, უკვე მეოთხე წელია საქართველოშიც. იგი დამწყები და საშუალო დონის მოთამაშეთა წვრთნით არის დაკავებული. მის მეცადინეობებზე ხალისი, ენერგია და უნარების განვითარება ჰარმონიულად არის შერწყმული ერთმანეთთან.

ფრენბურთი გუნდური სპორტის სახეობა. ფრენბურთის მოედანზე მოწინააღმდეგე გუნდებს შორის გადაჭიმულია ბადე, მოთამაშეები ცდილობენ, ბურთი ბადის ზემოთ გადააგდონ ისე, რომ მოწინააღმდეგის მოედანზე დაეცეს და მეტოქემ მისი მოგერიება ვერ შეძლოს.

ფრენბურთი, როგორც ყველა გუნდური სპორტი, არა მარტო ბურთთან ურთიერთიბას გულისხმობს, არამედ ურთიერთობას გუნდის წევრებთან. გარდა ფიზიკური მზაობისა ამ სპორტში საჭიროა თანაგუნდელების ნდობა და პატივისცემა. ეს სპორტი გაძლევს საშუალებას ფიზიკურ დატვირთვასთან ერთად იყო იმ პატარა ,,ოჯახის” ნაწილი, რომელსაც ჰქვია გუნდი და გუნდთან ერთად გამოსცადო დიდი გამარჯვებების და ზოგჯერ არანაკლებ დიადი დამარცხებების გემო.

“ევროპული სკოლის“ ფრენბურთის კლუბში მოსწავლეებს ვუნერგავთ პოზიტიურ ღირებულებებს კონკურენტულ გარემოში, ვეხმარებით ხასიათის წვრთნაში და ლიდერული უნარების ჩამოყალიბებაში.

გორგოლაჭებზე (როლიკებზე) სრიალის კლუბი არის ადგილი, სადაც მოსწავლეები უსაფრთხო და მხიარულ  გარემოში შეისწავლიან 21-ე საუკუნის სპორტს. როლერ სპორტი უნიკალური სპორტის სახეობაა, რომელიც ავითარებს კოორდინაციას და აძლიერებს მთელ სხეულს. მრავალწლიანი გამოცდილების მქონე, საქართველოში პირველი საერთაშორისოდ სერტიფიცირებული ტრენერი საინტერესო თამაშებსა და სახალისო ვარჯიშებს სთავაზობს  მონაწილეებს. ამ კლუბში მოსწავლეები შეიძენენ ახალ მეგობრებს, დაიმუხტებიან პოზიტიური ენერგიით და დააგროვებენ აუცილებელ ცოდნას, რომ დამოუკიდებლად დაიპყრონ ქუჩები და სკეიტ პარკები.

ჩვენი ჭადრაკის კლუბი მოქმედებს სკოლის შემდეგ, 5-დან 13 წლამდე მოსწავლეებისთვის. პროგრამა განკუთვნილია როგორც დამწყებთათვის, ასევე ეროვნული ჩემპიონებისთვისაც. კლუბს ხელმძღვანელობს ცნობილი მოჭადრაკე გიული ალიხანაშვილი, რომელიც მოსწავლეებს ეხმარება, შეისწავლონ როგორც ძირითადი წესები, ასევე მაღალი დონის სტრატეგიები, განივითარონ კრიტიკული აზროვნებისა და პრობლემების გადაწყვეტის უნარები; გიული ალიხანაშვილი საშუალებას აძლევს მოსწავლეებს, ეთამაშონ თანატოლებს სკოლაში და საქალაქო შეჯიბრებებზე, შეიძინონ ცოდნა ჭადრაკის ექსპერტებისა და ოსტატებისაგან საჩვენებელ თამაშებზე, რომლის დროსაც ისინი სკოლის კლუბის მოსწავლეებს ეთამაშებიან.

ჩვენი პროგრამა, რომელიც ტარდება გაკვეთილების შემდეგ, საშუალებას აძლევს ბავშვებს, მიაღწიონ წარმატებას საბრძოლო ხელოვნების დაუფლებაში. კარატე ეხმარება ბავშვებს, განივითარონ დისციპლინის, კონცენტრაციის, ყურადღების, თავდაჯერების, ძალისა და თავდაცვის უნარები და ა.შ. კარატეს გაკვეთილებზე ცნობილი კარატისტი გრიგოლ დარჩიაშვილი თქვენს შვილს შეასწავლის სხვადასხვა ილეთს, თავდაცვის ტექნიკებს, ასევე კატასა და კარატეს ტერმინოლოგიას (იაპონური ტერმინოლოგია) და ჩაატარებს ტრადიციული კარატეს გაკვეთილებს. გრიგოლ დარჩიაშვილის მოსწავლეები არიან ეროვნული და მსოფლიო ჩემპიონატების გამარჯვებულები.

ჩვენს თეატრალურ სტუდიაში მოსწავლეები გადიან რეპეტიციებსა და დგამენ წარმოდგენებს, რათა მიიღონ სახალისო საგანმანათლებლო გამოცდილება და გაეცნონ თეატრის ცხოვრების თავისებურებებს. მიგვაჩნია, რომ ახალგაზრდა მსახიობების განვითარების ერთ-ერთი საშუალება წარმოდგენებში მონაწილეობაა. სწორედ ამიტომ ვდგამთ წარმოდგენებს. ყოველ აკადემიურ წელს მოსწავლეები მონაწილეობას იღებენ განსხვავებულ სპექტაკლებში, რათა მრავალჯერ შეძლონ თეატრალურ სტუდიაში გაწევრება და ყოველ ჯერზე ისიამოვნონ ახალი გამოცდილებით.
ჩვენი კლასგარეშე თეატრალური სტუდია მხოლოდ დრამატურგიას როდი ასწავლის; სტუდია ასევე ახერხებს, მოსწავლეებს განუვითაროს თავდაჯერებულობის, შემოქმედებითობის, გუნდურობის, თვითდისციპლინისა და პრეზენტაციის ჩატარების უნარ-ჩვევები.
ჩვენი მაღალი ხარისხის სცენარები შექმნილია (ან ადაპტირებულია საბავშვო ლიტერატურიდან) თეატრალური სტუდიის სამხატვრო ხელმძღვანელის, ლიკა ქობულაძის მიერ; ლიკა თბილისის კოტე მარჯანიშვილის სახელობის სახელმწიფო აკადემიური დრამატული თეატრის მსახიობია.
სტუდიამ წარმატებით დადგა მიუზიკლი: “შობა სხვენში;“ რამდენიმე წარმოდგენა, მათ შორის: ქართული ზღაპარი “წიქარა,“ ალექსეი ტოლსტოის “ბურატინო,“ შარლ პეროს “წითელქუდა,“ ჰანს ქრისტიან ანდერსენის “ყინულის დედოფალი,“ უილიამ შექსპირის “ზაფხულის ღამის სიზმარი,“ კომპოზიცია “სიყვარული, სიყვარული, სიყვარული“ (ცნობილი ადამიანების სასიყვარულო წერილების მიხედვით), “საშობაო სიმღერა,“და ა.შ.
საუკეთესო წარმოდგენები დაიდგა არა მხოლოდ ჩვენს სკოლაში, არამედ თბილისის თეატრების სცენებზეც, მათ შორის კოტე მარჯანიშვილის სახელობის სახელმწიფო აკადემიურ დრამატულ თეატრში, ნოდარ დუმბაძის სახელობის მოზარდ მაყურებელთა თეატრში, სანდრო ახმეტელის სახელობის დრამატულ თეატრში, თავისუფალ თეატრში.
2012 წელს თბილისის მერიის მიერ ორგანიზებულ ახალგაზრდულ ფესტივალზე “ევროპული სკოლის“ წარმოდგენამ “ყინულის დედოფალი“ მიიღო პრიზი საუკეთესო შემოქმედებითი ჯგუფის კატეგორიაში.
2014 წელს “ოქროს საწმისის“ ფესტივალზე “ევროპული სკოლა“ დაჯილდოვდა “ყველაზე კრეატიული შემოქმედებითი ჯგუფის“ კატეგორიაში და გადაეცა დიპლომი შემდეგი წარმოდგენისთვის: “21-ე საუკუნეში დანახული მითოლოგია.“
2016 წელს, თეატრალური სტუდიის მიერ “ბურატინოს“ დადგმის შემდეგ, სამხატვრო ხელმძღვანელი და მოსწავლეები დაჯილდოვდნენ სპეციალური დიპლომებით შესანიშნავი სამუშაოს ჩატარებისთვის.

თექის კლუბი მიზნად ისახავს მოსწავლეებში განავითაროს ფანტაზია, წარმოსახვის უნარი, მხატვრული აზროვნება, კომპოზიციის შეგრძნება, წვრილი მოტორიკა და სხვ.

კლუბში გაწევრიანებული მოსწავლეები სწავლობენ თექის ხელნაკეთი ნამუშევრების დამზადებას. ქართული მატყლის გამოყენებით ქმნიან ქსოვილებს, თოჯინებს, მძივებს, ოსტატდებიან ქართული ხალხური რეწვის ნიმუშების შექმნაში. კლუბის წევრები მართავენ სააღდგომო, საშობაო  და შემაჯამებელ გამოფენებს, მონაწილეობას იღებენ ფესტივალებში, ატარებენ ვორქშოფებს და აქტიურად არიან ჩართულნი სასკოლო ღონისძიებებში.

თექის კლუბის უმთავრესი დანიშნულებაა, მოზარდებმა შეიყვარონ ხელოვნება და ხელსაქმე.

ES TV სასწავლო–შემოქმედებითი ლაბორატორიაა, რომელიც მოიცავს: საეთერო სტუდიას, სააპარატოსა და სამონტაჟოს, ასევე, გახმოვანების სტუდიას. აქ მოსწავლეები სწავლობენ ტელეჟურნალისტიკის, რეჟისორის, ოპერატორის ხელოვნებისა და მსახიობის ოსტატობის საფუძვლებს. ეუფლებიან სატელევიზიო და კინო ტექნიკას და ტექნოლოგიებს, პრაქტიკულად ახორციელებენ თავიანთ იდეებს: აკეთებენ ფილმებს, გადაცემებს, სიუჟეტებს. მოსწავლეები ეცნობიან ქართული და მსოფლიო კინოს შედევრებს.

ES TV–ს ბაზაზე 2011 წლის 1 ივნისიდან ჩამოყალიბდა საბავშვო კინოსტუდია და საბავშვო ფილმების საერთაშორისო ფესტივალი “ოქროს პეპელა“, რომელშიც მონაწილეობენ 19 წლამდე ასაკის მოზარდები. ფესტივალის პროგრამაშია: მოკლემეტრაჟიანი ფილმების კონკურსი, მასტერკლასები, ვორქშოპები და დაჯილდოების საზეიმო ცერემონია. ფესტივალი ყოველწლიურია და ავლენს გამარჯვებულებს 10 ნომინაციაში. კონკურსს აფასებს კომპენტენტური ჟიური და ბავშვთა ჟიური. ES TV–ს მოსწავლეთა ნამუშევრები ხშირად იგზავნება საერთაშორისო ფესტივალებზე, საიდანაც ისინი ყოველთვის გამარჯვებულები ბრუნდებიან.

გიტარის სტუდიაში მოსწავლეები ხალისით სწავლობენ გიტარის ძირითად ტექნიკებსა და გიტარაზე სხვადასხვა სიმღერის აწყობას. გიტარის გაკვეთილებს ატარებს კვალიფიციური მასწავლებელი მეგი კახნიაშვილი. მასწავლებელი მთელ ყურადღებას უთმობს მოსწავლეებს, მოსწავლეები კი სარგებლობენ გაკვეთილების სერიებით, რომლებიც იგეგმება და სათითაოდ ერგება მოსწავლეების სპეციფიკურ საჭიროებებსა და მათივე სწავლის სტილს. პროგრესი შედარებით მსუბუქად და ადვილად მიიღწევა. სტუდიაში, გაკვეთილებთან ერთად, მოსწავლეებს ეძლევათ კონცერტებისა და ღონისძიებების მოწყობის საშუალება.

ცეკვის კლუბს უძღვება პროფესიონალი მოცეკვავე: დავით დარასელია. ცეკვის კლუბის პროგრამა განკუთვნილია სხვადასხვა ასაკის მოსწავლეებისთვის, გაკვეთილების შემდეგ. მოსწავლეები შეისწავლიან ქართულ ეროვნულ ცეკვებს. კლუბის ყველა წევრს საშუალება ეძლევა, მიიღოს სიამოვნება ცეკვისაგან, მათაც კი, ვისაც არ გააჩნია ცეკვის გამოცდილება. ცეკვის კლუბის ყველა მონაწილე ერთვება სკოლის სხვადასხვა ღონისძიებაში. ცეკვის კლუბი მოითხოვს დიდ შრომას, მონდომებასა და ყურადღებას.

რობოტიქსის კლასგარეშე კლუბი მნიშვნელოვნად აუმჯობესებს მოსწავლის ჩართულობას STEM საგნებში. რთული კონსტრუქციის რობოტების აწყობის, დიზაინის შექმნისა და პროგრამირების უშუალო გამოცდილება აუმჯობესებს გუნდური მუშაობისა და პრობლემების გადაწყვეტის უნარებს და ეხმარება ბავშვებს, გააცნობიერონ, როგორ არის ერთმანეთთან პრაქტიკულად დაკავშირებული ისეთი დისციპლინები, როგორებიცაა: მათემატიკა, ინჟინერია და კომპიუტერული მეცნიერებები. კლუბის ხელმძღვანელი, დავით ნოზაძე, ამზადებს მოსწავლეებს რობოტიქსის კონკურსებში მონაწილეობის მისაღებად, სადაც მათ პირდაპირი შეხება აქვთ ამაღელვებელ, შემოქმედებითსა და პრაქტიკული გამოწვევებით სავსე სამყაროსთან.

დებატების კლუბი,რომელშიც მიიღებიან  VII-IX კლასის მოსწავლეები, აქტიურად მუშაობს მთელი სასწავლო წლის განმავლობაში. კლუბის შეხვედრები მოიცავს სისტემატიურ ყოველკვირეულ მეცადინეობებს, ჯგუფის წევრებთან მორგებული გრაფიკით, საშუალოდ 2 საათის განმავლობაში.

სწავლების პროცესში ხდება ფორმალური დებატების ტექნიკის სწავლება და სახალისო აქტივობებით ისეთი უნარების განვითარება, როგორიცაა კრიტიკული აზროვნება, პრეზენტაციების მომზადება, დროის მართვა, გუნდურობა, მოკვლევის წარმოება, ოპონენტის პატივისცემა, ყველაფერი, რაც ორატორობასთანაა დაკავშირებული და აკადემიურ სწავლებაში უწყობს მოსწავლეებს ხელს.

სასწავლო კურსის სრულფასოვნად გავლის შემდეგ მოსწავლეები მიიღებენ საერთაშორისო დონეზე აღიარებულ სერთიფიკატს. გარდა ამისა, დებატების კლუბის წევრებს შესაძლებლობა ეძლევათ ჩაერთონ დებატებისა და განათლების ინსტიტუტის სხვადასხვა ნაციონალურ თუ საერთაშორისო აქტივობაში.

დებატების კლუბი ჩამოყალიბებულია საერთაშორისო დებატების საგანმანათლებლო ასოციაციის (IDEA) წევრი ორგანიზაციის, დებატებისა და განათლების ინსტიტუტის მიერ.

მათემატიკური ამოცანები მონსტრებად გეჩვენება? არ შეშინდე, “მათემატიკის შურისმაძიებლები“ აქ არიან შენს გადასარჩენად! თუ მათემატიკა შენთვის დიდი თავსატეხია, ჩვენი კლუბი გახდება  გზამკვლევი, დაგეხმარება გამოწვევების დაძლევაში და  მათემატიკის გმირად გაქცევს.

კლუბის მეცადინეობებზე გავარჩევთ საკითხებს, რომლებიც მოსწავლეებს გაუჭირდათ და ვერ გაიგეს საგაკვეთილო პროცესში, შესაბამისად, მოსწავლეები თავად შეარჩევენ ყოველი დღის თემატიკას.

ონლაინ თამაშების პროგრამირების კლუბი იწვევს 7-11 წლის მოზარდებს და გააცნობს მათ ონალინ თამაშების შექმნის საფუძვლებს პროგრამირების საშუალებით, Scratch, Minecraft Education, და CodeHS პლატფორმების გამოყენებით. კლუბის სახალისო აქტივობები მოიცავს: თამაშების შექმნას კოდირების ჩამოთვლილი ინტერაქციული პლატფორმების გამოყენებით, კრეატიული კოდირების ტექნიკის დაუფლებას, ნასწავლის პრაქტიკაში განხორციელებას, იდეების დანერგვასა და ექსპერიმენტირებას. მოსწავლეები შეისწავლიან კომპიუტერული მეცნიერების საფუძვლებს, მიიღებენ მონაწილეობას სასკოლო კონფერენციებსა და საერთაშორისო კონკურსებში: World Scratch შეჯიბრები, Scratch ოლიმპიადები, Minecraft Global Challenges.

“ევროპული სკოლის“ მოსწავლეებს შესაძლებლობა აქვთ თანამედროვე ცეკვის სტუდიაში შეისწავლონ ჰიპ-ჰოპი. 6-დან 16-წლამე მოზარდებს შეასწავლიან თანამედროვე ცეკვის ილეთებს. სტუდიას კ. მარჯანიშვილის თეატრის მსახიობი, უამრავი სპექტაკლის დამდგმელი ქორეოგრაფი, ქართულ-ფრანგული, ოსკარზე ნომინირებული ფილმის მთავარი როლის შემსრულებელი თემურ ქამხაძე ხელმძღვანელობს.

“ევროპულ სკოლაში“ ხელოვნების სტუდიის ხატვის გაკვეთილები მოსწავლეს ავსებს შემოქმედებით, შთაგონებითა და ხალისით. ყველა მოსწავლე იღებს ინდივიდუალურ, მისთვის რელევანტურ ინსტრუქციებს კვალიფიციური და პროფესიონალი მხატვრისგან, ანა მინდიაშვილისგან. ანა ენთუზიაზმით ეკიდება თქვენი შვილის განათლებას ხელოვნებაში. ხატვის ყოველ გაკვეთილზე მოსწავლეები სწავლობენ ხატვის სხვადასხვა ტექნიკას და ამასთანავე, ენიჭებათ თავისუფლება, გამოხატონ საკუთარი თავი მათივე ნამუშევრების მეშვეობით. ხატვის გაკვეთილებზე განიხილება შემდეგი ასპექტები: ჩრდილებზე მუშაობა, სივრცე, კომპოზიცია, პორტრეტი, პეიზაჟი,რეალიზმი, აბსტრაქციონიზმი და სხვა.

ციფრული დიზაინის კლუბში ვიყენებთ პიქსელებს და კრეატიულობას ციფრული სამყაროს გასაცოცხლებლად. ჩვენი კლუბი არის დინამიური პლატფორმა, სადაც მოსწავლეები შეისწავლიან ციფრული დიზაინის მიმართულებებს, როგორიცაა გრაფიკული დიზაინი, ვებ დიზაინი და ანიმაცია. სხვადასხვა პროექტის მეშვეობით, მოსწავლეები განივითარებენ კრეტიულ უნარებს და  შეისწავლიან  ვიზუალური თხრობის ხელოვნებას.  მაგრამ ეს ყველაფერი არ არის – მას შემდეგ, რაც კლუბის წევრები შექმნიან  ციფრულ შედევრებს, კლუბი სთავაზობს დანადგარებს, რათა გააცოცხლონ ნიმუშები. ციფრული დიზაინის კლუბი აღჭურვილია პროფესიონალური  პრინტერებით ბანერების, სტიკერებისა და სხვა მსგავსი შინაარსის პროდუქტის შესაქმნელად.

კლუბის წევრები ეზიარებიან კერამიკისა და ძერწვის პრაქტიკულ კურსს, როგორც არტ-თერაპიის ერთ-ერთ ფორმას. მოზარდები ჩაერთვებიან თიხაზე მუშაობის შემოქმედებითი პროცესში, რაც საშუალებას მისცემთ, გამოხატონ  შინაგანი სამყარო და საკუთარი განცდები, შემოქმედებაში ასახონ საკუთარი ინდივიდუალობა.
ძერწვის პროცესი, თიხასთან ან პლასტელინთან მუშაობა, ადამიანს სიმშვიდის განცდას ანიჭებს. კერამიკის კეთების პროცესში წარმოქმნილი სტიმულაცია ხელს უწყობს აღქმების გაძლიერებას, სენსორულ სტიმულაციას.

კლუბის მუშაობისას  ნამუშევრები შეიქმნება თიხასა და პლასტელინში, თიხის ყველა ნიმუში მოჭიქურდება და გამოიწვება. წელიწადში ორჯერ (სემესტრის ბოლოს) “ევროპული სკოლის“ სივრცეში მოეწყობა ჯგუფური გამოფენები,  სადაც მოწვეულები იქნებიან ცნობილი ქართველი მხატვრები.

კურსს გაუძღვება მხატვარი და კერამიკოსი გიორგი ტაბლიაშვილი – მრავალი საერთაშორისო სამხატვრო გამოფენის მონაწილე და ასევე არაერთი საერთაშორისო გამოფენის ორგანიზატორი.

5-10 წლის მოსწავლეებისთვის:

კეთილი იყოს თქვენი მობრძანება ნორჩ ინჟინერთა კლუბში, რომელიც წარმოადგინა Let’s Start Up-მა!  ჩვენი კლუბი, რომელშიც ინჟინერიის სამყარო ცოცხლდება სარბოლო მანქანებით, რთული ელექტრო სქემებით, ძლიერი ძრავებით,  საინტერესო თავგადასავალია 5-10 წლის მოსწავლეებისთვის. მექანიკური და ელექტრო ინჟინერიისთვის საჭირო უნარებს კლუბის მოსწავლეები  პროექტებზე დაფუძნებული სწავლების გზით ივითარებენ. იმისთვის, რომ სწავლის პროცესი კიდევ უფრო პრაქტიკული გახდეს, ყველა ბავშვს ეძლევა საკუთარი პერსონალური საინჟინრო კომპლექტი, პროექტის დასრულების შემდეგ კი მოზარდი სახლში შეძლებს თავის მიერ შექმნილი ნიმუშის წაღებას.

კლუბის მეცადინეობებს ხელმძღვანელობენ გამოცდილი სპეციალისტები ინგლისურ ან ქართულ ენებზე. შემოგვიერთდით ნორჩ ინჟინერთა კლუბში, სადაც მოზარდთა შემოქმედებითობას არ აქვს საზღვრები!

11-16 წლამდე მოსწავლეებისთვის:
კეთილი იყოს თქვენი მობრძანება Arduino პროგრამირების კლუბში, რომელსაც გთავაზობთ Let’s Start Up-ი. ჩვენი კლუბი, სადაც ინოვაცია იკავებს მოწინავე ადგილს, არის  11-16 წლის დამწყები ინჟინრებისთვის. მექანიკური ინჟინერიის, ელექტრო ინჟინერიისა და უახლესი Arduino პროგრამირების ნაზავით, პროექტული სწავლებით, კლუბი გთავაზობთ საუნივერსიტეტო დონის სასწავლო გამოცდილებას.
წარმოიდგინეთ, რომ შეაბიჯეთ ავტომობილების სამყაროში, დაეუფლეთ C++ პროგრამირებას და ითვისებთ Arduino ტექნოლოგიის პოტენციალს!

ყველა მოსწავლე მიიღებს Arduino-ს პირად კომპლექტს და ექნება შესაძლებლობა, თავის მიერ შექმნილი ნიმუში წაიღოს სახლში.
ჩვენი ექსპერტი მასწავლებლები კლუბის მეცადინეობებს ატარებენ ინგლისურ და ქართულ ენებზე. შემოგვიერთდით Arduino პროგრამირების კლუბში, სადაც მოზარდი განივითარებს ტექნიკურ ხედვას,  მომავალი თქვენია!

მუსიკისა და ვოკალის კლუბში მოზარდები  შეისწავლიან სასცენო ხელოვნებას, გაიუმჯობესებენ მუსიკალური რითმის გრძნობას, დიქციას, ისწავლიან სიმღერის დროს სწორად სუნთქვას. მათთვის რეპერტუარი შეირჩევა ინდივიდუალურად. მოზარდები ჩაერთვებიან სკოლის მიერ დაგეგმილ ღონისძიებებში.

პოპულარული მუსიკის კლუბში მოზარდები შეისწავლიან ყველა დროის, ქართული დაუცხოური პოპ და ჯაზური სიმღერების ვერსიებს. სიმღერების შესწავლამდე დაამუშავებენ ხმას ვოკალიზების საშუალებით, განივითარებენ მუსიკალურ სმენას, რითმის გრძობას სპეციალური რითმიკის სავარჯიშოებით. შეირჩევა მათთვის შესაფერისი სიმღერები და დამუშავდება ინდივიდუალურად. მოზარდები ჩაერთვებიან სკოლის მიერ დაგეგმილ ღონისძიებებში. ყველაფერ ამაზე იზრუნებენ გამოცდილი პედაგოგები: მომღერალი, ვოკალის პედაგოგი მანანა კიკილაშვილი და პიანისტი, ცნობილი ჯაზმენი, ჯაზის კორიფე, ვირტუოზი მუსიკოსი ოთარ მაღრაძე.

პროდუქტის დიზაინის კლუბი არის ის ადგილი, სადაც ფუნქცია ინოვაციურად არის გააზრებული. თუ თქვენ გაინტერესებთ ისეთი პროდუქტის შექმნა, რომელიც აუმჯობესებს ადამიანის ცხოვრებას, ეს კლუბი სწორი არჩევანია. კლუბის მეცადინეობებზე ყურადღებას ვამახვილებთ პროდუქტის შექმნის სრულ პროცესზე, იდეიდან და პროტოტიპირებიდან დაწყებული, წარმოებით bდასრულებული. აქ მოსწავლეებისთვის ხელმისაწვდომია უახლესი ტექნოლოგიები, ვიყენებთ FabLab-ის ისეთ დანადგარებს, როგორიცაა ლაზერული მჭრელი, 3D პრინტერი და CNC ჩარხი, რათა კონცეფციები ხელშესახებ, ფიზიკურ პროდუქტებად ვაქციოთ. ჩვენი კლუბი გაწვდით ცოდნასა და უნარებს, წარმოების უახლეს ტექნოლოგიებს, რათა შექმნათ პროდუქტი, რომლებიც ესთეტიურიც არის და სარგებლობის მომტანიც.

ჯგუფური ფსიქოთერაპია ეხმარება ბავშვებს, სასიამოვნო გზებით დაძლიონ შემდეგი ტიპის სირთულეები:

• ადვილად ადაპტირდნენ ახალ სოციალურ გარემოში;
• გააუმჯობესონ კლასელებთან კომუნიკაცია;
• გაეცნონ სტრესის გამკლავების უმტკივნეულო გზებს;
• მარტივად გადალახონ ასაკობრივი სირთულეები;
• ეკოლოგიური გზით გამოხატონ აგრესია, ბრაზი, წყენა;
• გააუმჯობესონ მშობლებთან კომუნიკაცია;
• უკეთ გამოხატონ საკუთარი თავი;
• აიმაღლონ თვითშეფასება;
• აიმაღლონ ემოციური ინტელექტი;
• მოაგვარონ პირადი ურთიერთობები;
• მარტივად დაძლიონ სხვა ტიპის სირთულეები.

მუშაობისას გამოენებული იქნება არტთერაპიული მეთოდები: მეტაფორული ბარათები, ხატვა, ძერწვა, ქვიშათერაპია, ნიღბებით თერაპია, ზღაპართერაპია, დეკორატიული ქვებით თერაპია, თერაპია ნიჟარების გამოყენებით.

ზღაპრით თერაპია არის მეთოდი, რომელიც ბავშვებში ემოციური ინტელექტის განვითარებას, შემოქმედებითი შესაძლებლობების გაფართოებასა და სოციალური უნარების სრულყოფას უწყობს ხელს. ამ მეთოდის მიხედვით ზღაპარი არამარტო წარმოსახვის, ფანტაზიის განვითარების, კითხვით დაინტერესების, ცნობისმოყვარეობის დაკმაყოფილების, მორალური ღირებულებების გადმოღების საშუალებაა, არამედ   მისი დახმარებით ხდება კონფლიქტების მოგვარების ტექნიკების შესწავლა, შიშების მართვა, აგრესიული და ჩაკეტილი ქცევის კორექტირება, ასერტული ქცევის უნარების განვითარება.
კლუბის მუშაობისას ხდება ზღაპრის წაკითხვა, განხილვა, მოსწავლეთა მიერ საკუთარი შეხედულებების გამოხატვა, გაანალიზება-მსჯელობა.  კლუბის მეცადინეობებში ჩაშენებულია არტ-თერაპიის ელემენტები. ბავშვები ხატავენ ზღაპრის იმ ნაწილს, რომელიც მათთვის მნიშვნელოვანია, შემდეგ კი მსჯელობენ ნამუშევრის ირვლივ.

იტალიური ენისა და კულტურის კლუბი იწვევს 6-დან 16 წლამდე მოსწავლეებს. კომუნიკაციური მეთოდი გაკვეთილებს მასტიმულირებელს და სახალისოს ხდის. იგი ითვალისწინებს მოსმენის, თამაშების, ზეპირსიტყვირი და წერილობითი მასალის თუ მრავალი სხვადასხვა აქტივობის კომბინაციას და ხელს უწყობს ენის სწორად, მარტივად ათვისებას და იძლევა იტალიურად საუბრის  უამრავ შესაძლებლობას.

ბავშვებისთვის უცხო ენის გაგებისა და საუბრის პროცესი უნდა იყოს სახალისო. ჩვენ ვიყენებთ როგორც იტალიური ენის შესასწავლ სხვადასხვა საბავშვო სახელმძღვანელოს, ასევე ვიდეო-აუდიო მასალას, სიმღერებს, თამაშებს, სახალისო აქტივობებს, რაც ხელს უწყობს იტალიური ენის  ათვისებას ბუნებრივად, თამაშის გზით.

უცხოელი ანუ არა იტალიელი ბავშვებისთვის შექმნილი ეს პროგრამა მოსწავლეს აძლევს მეტ სტიმულსა და მოტოვაციას და ასევე შეგრძნებას, რომ იტალიური ენა განიხილოს, როგორც სასარგებლო ინსტრუმენტი სხვა ბავშვებთან სათამაშოდ და საკომუნიკაციოდ.

იაპონური ენის კლუბში მოსწავლეები დაეუფლებიან იაპონურად წერა-კითხვასა და მეტყველებას, ასევე გაეცნობიან იაპონურ კინოს, ანიმეს, ლიტერატურას, ისტორიასა და მითოლოგიას. ჩვენი მეთოდი მარტივი და თანმიმდევრულია, რადგანაც ამოსავალი არის,   ენის სწავლა გავხადოთ მაქსიმალურად სახალისო.

ესპანური ენის  გაკვეთილები  ინვესტიციაა თქვენი შვილის მომავალში!

უცხო ენების სწავლა ავითარებს კომუნიკაციის უნარს, ხელს უწყობს მეხსიერებისა და ყურადღების კონცენტრაციის განვითარებას. პროგრამა ითვალისწინებს თამაშებისა და სახალისო სავარჯიშოების გამოყენებას, რაც ძალიან ეფექტიანია ნებისმიერი ასაკის ბავშვების სწავლებისთვის. კლუბის მუშაობის მთავარი  ამოცანაა, ბავშვებს  ჩაუნერგოს ესპანური ენისადმი სიყვარული. კლუბის მეცადინეობებზე მოსწავლეები  ესპანური ენის  სწავლასთან ერთად  გაიცნობენ ესპანეთისა და ესპანურენოვანი ქვეყნების ისტორიას, კულტურასა და ტრადიციებს.

ჩინური ენის კლუბში მოსწავლეები ჩინური ენის საფუძვლებს დაეუფლებიან, ამავდროულად განივითარებენ სმენის, მეტყველების, კითხვის და წერის უნარ-ჩვევებს. ჩინური ენის კლუბის მასწავლებელია მაირუი ჯიქენი, რომელიც შეეცდება, მოსწავლეები ჩინური კულტურითა და ისტორიით დააინტერესოს.