ახალი ამბები

გაეროს დღისადმი მიძღვნილი პოსტერების გამოფენა

25 Oct 2018

გაეროს დღესთან დაკავშირებით, 24 ოქტომბერს ევროპული სკოლის IB საბაზო პროგრამის მოსწავლეებმა ემოციური ჯანმრთელობის თემაზე მათ მიერ შემქნილი პოსტერები გამოფინეს. პოსტერები ეხებოდა ისეთ აქტუალურ თემებს, როგორებიცაა: 1) რა არის ემოციური ჯანმრთელობა? 2) როგორ ვიზრუნოთ ჩვენს ემოციურ ჯანმრთელობაზე? მოცემული აქტივობა უცხო ენების შესწავლის პროგრამის ფარგლებში განხორციელდა და უკავშირდება ჩვენი სტუდენტებისათვის გლობალური ხედვის ჩამოყალიბებას.

პირველი PYP ასამბლეა - მოსწავლეთა ჩართულობის გასაზრდელად

24 Oct 2018

22 ოქტომბერს ჩატარდა საერთაშორისო ბაკალავრიატის დაწყებითი პროგრამის (1-5 კლასები) პირველი ასამბლეა. ასამბლეის ძირითადი თემა იყო IB Learner Profile, რომელიც გულისხმობს იმის განსაზღვრას, თუ რა ტიპის პიროვნულ მახასიათებლებს უნდა ფლობდეს ბავშვი IB პროგრამის სასწავლო პროცესში მაქსიმალურად ეფექტური მონაწილეობისათვის. მოსწავლეებმა ამ თემაზე კითხვა-პასუხის რეჯიმში ისაუბრეს და უყურეს ინფორმაციულ ვიდეოებს IB Learner Profile-ის შესახებ. გარდა ამისა, გაიმართა მოსწავლეთა მიერ გადაღებული ვიდეორგოლების ჩვენება, რომლებიც მიზნად ისახავდა ბავშვებისათვის ჩვენი სკოლის ყოველდღიური რეჟიმის, ქცევისა და უსაფრთხოების წესების უკეთ გაცნობას. სასწავლო წლის მანძილზე, ამ ფორმატის ასამბლეები ყოველთვიურად ჩატარდება. მათი ძირითადი მიზანია სკოლის ცხოვრებაში მოსწავლეთა ჩართულობის გაზრდა და სიტუაციური სწავლების გაძლიერება.

შეხვედრა გიორგი კეკელიძესთან

24 Oct 2018

ოთხშაბათს, 24 ოქტომბერს, გაიმართა გიორგი კეკელიძის შეხვედრა ჩვენი სკოლის მე-4 კლასელებთან. ცნობილი მწერალი ბავშვებს ესაუბრა წიგნების შექმნის თემაზე.

ხატვა ხელნაკეთი ბუნებრივი საღებავებით

23 Oct 2018

ჯანსაღი ცხოვრების წესის თემის ფარგლებში, ჩვენმა მე-3 კლასელებმა ხელოვნების გაკვეთილზე საკუთარი ხელით, ნულიდან დაამზადეს ეკო საღებავები. საღებავების მისაღებად მათ გამოიყენეს ნატურალური პიგმენტი ისეთი ბუნებრივი მასალებისაგან, როგორებიცაა: ბალახი, სანელებლები, ყავა, ხილის წვენი, ფქვილი, ნახშირი და ა.შ. ხელნაკეთი საღებავების დახმარებით, პატარა ხელოვნებმა ულამაზესი, ფერადი ნახატები შექმნეს. მათი ხუთივე შეგრძნება აქტივირებული იყო ამ კრეატიული პროცესის დროს.

ცნობილი რუსი ენათმეცნიერების სემინარი ევროპულ სკოლაში

23 Oct 2018

20-21 ოქტომბერს ევროპულ სკოლაში ჩატარდა სემინარი "რუსულის, როგორც უცხო ენის სწავლების მეთოდიკა", რომელსაც უძღვებოდნენ ამ სფეროს ექსპერტები - ცნობილი რუსი ენათმეცნიერები სტანისლავ ჩერნიშოვი და მისი მეუღლე ანნა ჩერნიშოვა. სემინარს ესწრებოდნენ რუსული ენის სკოლის პედაგოგები და უმაღლესი სკოლის ლექტორები მთელი საქართველოდან. მონაწილეებმა ძალიან სასარგებლო და ინფორმაციით დატვირთული ორი დღე გაატარეს, რის შემდეგაც მათ გადაეცათ სერთიფიკატები.

პირველადი დახმარების ტრენინგი წითელი ჯვრისაგან

23 Oct 2018

ტრანსდისციპლინარული თემის ფარგლებში "როგორ მუშაობს სამყარო", IB-ს მოსწავლეები სწავლობენ პროცესების შესახებ, რომლებიც გამოიყენება ამა თუ იმ სიტუაციაში სტრუქტურიზებული ქმედებების საშუალებით უკეთესი შედეგების მისაღებად. ევროპულმა სკოლამ უმასპინძლა წითელი ჯვრის კოორდინატორ თეა ჩიკვილაძეს, რომელმაც ჩვენს მე-5 კლასელებს ჩაუტარა ტრენინგი პირველადი დახმარების შესახებ. ბავშვებმა ისწავლეს ხელოვნური სუნთქვის ჩატარება და პირველადი დახმარების აღმოჩენა . გარდა ამისა, მათ გაიგეს პრობლემების შესახებ, რომლებიც საფრთხეში მყოფ ადამიანს შეიძლება შეექმნას და შეისწავლეს მათი მოგვარების გზები.

ახალი VS მაცივარში შენახული ხილი

23 Oct 2018

საკვების შესწავლის პროექტის ფარგლებში, ევროპული სკოლის IB პროგრამის მე-5 კლასელებმა ჩაატარეს კვლევა-დეგუსტაცია და ერთმანეთს შეადარეს ახალი და მაცივარში შენახული ხილის გემოები. მათ გააანალიზეს მიღებული შედეგები და კიდევ ერთხელ დაინახეს ახალი პროდუქტებით კვების უპირატესობა.

ვიზიტი ქართული ხალხური სიმღერისა და საკრავების სახელმწიფო მუზეუმში

23 Oct 2018

"კულტურებს შორის განსხვავებებისა და მსგავსებების" სასწავლო თემის ფარგლებში, ჩვენი სკოლის IB დაწყებითი პროგრამის მე-4 კლასელები ქართული ხალხური სიმღერისა და საკრავების სახელმწიფო მუზეუმს ესტუმრნენ. მუზეუმში წარმოდგენილია ქართული, აღმოსავლური და ევროპული ფოლკლორული სიმღერების ნიმუშები და მუსიკალური ინსტრუმენტები. გარდა მუსიკალური ინსტრუმენტებისა, ბავშვებმა დაათვალიერეს სხვადასხვა არტეფაქტები, ფოტო და ვიდეო მასალა. მოსწავლეებს თან ახლდათ მათი მუსიკის მასწავლებელი, რომელთან ერთადაც მომდევნო გაკვეთილებზე გამოიყენებენ მუზეუმში მიღებულ ცოდნას.

ა.შ.შ.-ს უნივერსიტეტები EducationUSA-ს მინი-გამოფენაზე ევროპულ სკოლაში

22 Oct 2018

ევროპული სკოლის ამოცანაა, დავეხმაროთ ჩვენს მოსწავლეებს მათ წინაშე მდგარი უმაღლესი განათლების შესაძლებლობებზე ამომწურავი ინფორმაციის მიღებაში. იმის მიუხედავად, თუ რა ტიპის სასწავლებელს მიანიჭებენ უპირატესობას, ჩვენი ძირითადი მიზანია, გავუმარტივოთ მათ უმაღლესში ჩაბარების კომპლექსური პროცესი, იქნება ეს საზოგადოებრივი კოლეჯი თუ სახელმწიფო სკოლა, რეგიონალური უნივერსიტეტები თუ მსოფლიოს წამყვანი მაღალრეიტინგული, სელექციური ინსტიტუტები. სწორედ ამიტომ, ვუმასპინძლეთ ამ გამოფენას და ერთ სივრცეში მოვუყარეთ თავი სხვადასხვა ტიპის უმაღლესი საგანმანათლებლო დაწესებულებების დელეგაციებს ა.შ.შ.-დან.