8 აპრილი “ევროპულ სკოლაში“ პროფესიული განვითარების დღედ გამოცხადდა. 100-მდე პედაგოგს სპეციალური ტრენინგები ორგანიზაცია MAC Georgia-ს და “ბრიტანეთის საბჭოს“ წარმომადგენლებმა ჩაუტარეს. ინტერაქციულ რეჟიმში წარმართული შეხვედრები ძალიან საინტერესო და ინფორმატიული აღმოჩნდა სხვადასხვა ფოკუსჯგუფებისთვის. პედაგოგები სპიკერებს უზიარებდნენ საკუთარ გამოცდილებას, ხოლო გამომსვლელები მსჯელობდნენ მოსწავლის თანამედროვე აღზრდისა და განვითარების შესაძლებლობებზე. ტრენინგების თემა იყო: ქცევის მართვა, სწავლების უნივერსალური მეთოდები, აკომოდაცია და მოდიფიკაცია, სასწავლო სტრატეგიები და ბავშვთა უფლებების დაცვა. “ევროპული სკოლის“ დირექცია, ხარისხის მართვის სამსახური მომავლშიც იზრუნებს პედაგოგთა პროფესიულ განვითარებაზე.

“ევროპული სკოლა“ განსაკუთრებულ სტუმრებს ნორვეგიელ მუსიკოსებს მასპინძლობდა. მათ განსხვავებული სწავლების მეთოდით მუსიკის გაკვეთილები PYP პროგრამის 3-5 კლასის მოსწავლეებს ჩაუტარეს. ნორვეგიული მუსიკის აკადემია ლიდერია მუსიკის პედაგოგიკის სფეროში. მუსიკოსები თბილისის სახელმწიფო კონსერვატორიის პროექტის ფარგლებში ეწვივნენ საქართველოს და “ევროპული სკოლის“ მუსიკის პედაგოგის ნინო ჭალისურის ინიციატივით ახალი სწავლების მეთოდებით ჩაატარეს გაკვეთილები, რომელიც ძალიან საინტერესო და დაუვიწყარი აღმოჩნდა მოსწავლეებისთვის. თებერვალში ნინო თავად იმყოფებოდა ოსლოში. მან შეისწავლა მუსიკის სწავლების ინოვაციური მეთოდები და ახალა უკვე “ევროპულ სკოლაში“ ნერგავს სიახლეებს. მუსიკოსების ჯგუფმა გაკვეთილების შემდეგ სოლო კონცერტი გამართეს, რომელიც სრული ანშლაგით ჩატარდა. ოსლოს მუსიკის აკადემია და “ევროპული სკოლა“ მომავალშიც გააგრძელებენ შემოქმედებით ურთიერთობას.

2 აპრილი აუტიზმის ცნობადობის ამაღლების მსოფლიო დღეა. “ევროპული სკოლა“ დიდი ენთუზიაზმით შეუერთდა კამპანიას #მეაქვარ #შენსადხარ? აუტიზმის ეროვნული ცენტრის დასახმარებლად “ბარამბომ“ გამოუშვა უგემრიელესი შოკოლადები, რომელიც 1 ლარად “სპარისა“ და “კარფურის“ მაღაზიათა ქსელში იყიდება. ჩვენი სკოლის მოსწავლეები ჩაერთნენ კამპანიაში და სხვა თანატოლებიც გამოიწვიეს. შემოგვიერთდით #მეაქვარ #შენსადხარ?

3 აპრილს “ევროპული სკოლის“ ლონდონის გამზირზე ალინა სპანოვას პერსონალური გამოფენა მოეწყო. ალინა IB PYP მე-5 (C) კლასის მოსწავლეა, რომელიც ძალიან საინტერესო ნამუშევრებით წარდგა დამთვალიერებლის წინაშე. ექსპოზიცია მოიწონეს და დადებითად შეაფასეს სამხრეთ კორეული არტ ფესტივალის Dream Summit-ის ორგანიზატორებმა.

26 მარტს “ევროპული სკოლის“ ქართული პროგრამის 1ბ კლასის მოსწავლეები ჩრდილების თეატრს “ბუდრუგანა გაგრას“ ესტუმრნენ. სპექტაკლის შემდეგ უნიჭიერესმა მსახიობებმა პატარა მაყურებლებს ჩაუტარეს მასტერკლასი და ერთად გაითამაშეს მიზანსცენები. თეატრში მოსწავლეებს საოცარი გარემო დახვდათ, დადებითი და თბილი ემოციაებით დაბრუნდენენ სკოლაში.

4 აპრილს “ევროპულ ბაღში“ გამოფენა მოეწყო სახელწოდებით “როგორ მუშაობს სამყარო.“ ექსპოზიციის შექმნაში მონაწილეობა ბავშვებისთვის ძალიან საინტერესო და სახალისო აღმოჩნდა. მათ ბევრი რამ შეიტყვეს ცხოველთა და ფრინველთა სამყაროს, მწერების, ამფიბიების შესახებ. პატარებმა საკუთარი ნამუშევრები მშობლებსა და ოჯახის წევრებს გააცნეს.

ამერიკული უმაღლესი სკოლის მე-8-9 კლასის მოსწავლეები საგაზაფხულო არდადეგების გსატარებლად იტალიაში გაემგზავრნენ. ფლორენციასა და რომში მათ მოინახულეს ყველაზე ცნობილი მუზეუმები და დაათვალიერეს ქალაქის არქიტექტურა. ექსკურსიაზე ბავშვებთან ერთ მასწავლებლები, მშობლები და სკოლის დეკანი ნათია თევზაძე იმყოფებოდა.

“ევროპულ სკოლაში“ მოსწავლეთა ფიზიკური ჯანმრთელობა ძალიან მნიშვნელოვანია, ამიტომაც სკოლის ექიმის ინიციატივით მოვიწვიეთ “ავერსის“ კლინიკის  სპეციალისტები: ექიმი-ორთოპედი და ექიმი-ოფთალმოლოგი, რომელთაც ჩაატარეს სკრინინგი.

22 მარტს “ევროპული სკოლის“ სპორტდარბაზში “ამერიკული უმაღლესი სკოლის“ გუნდი IGS-ის კალათბურთის გუნდს შეხვდა. დაძაბულ ბრძოლაში ჩვენი სკოლის მოსწავლეებმა ანგარიშით 87-55 დაამარცხეს მეტოქის გუნდი და გულშემატკივრებს დიდი სიხარული მოუტანეს.