“ევროპული სკოლის“ სახელმწიფო და სამართლის პედაგოგის მაია მელიქიშვილის, ქიმიის პედაგოგის ხათუნა კაპანაძის და მე-10ა,ბ კლასის მოსწავლეების მიერ ინიცირებული პროექტის ,,კრიმინალისტიკა და სამართალი“ ფარგლებში, 4 თებერვალს მოსწავლეთა ინფორმირების მიზნით სკოლაში მოწვეული იყო შშს საექსპერტო კრიმინალისტიკური დეპარტმენტის დირექტორი ბ-ნ სერგო ძაგნიძე. შეხვედრამ დიდი ინტერესი გამოიწვია მოსწავლეებში. ბატონმა სერგომ შეძლო მათი დაინტერესება ამ რთული და საინტერესო საქმიანობით. პროექტი არის გრძელვადიანი და მის ფარგლებში იგეგმება რამდენიმე საინტერესო ღონისძიება.

5 თებერვალს “ევროპულ სკოლას“ “ვებსტერის უნივერსიტეტის“ კანცლერი და მმართველი დირექტორი ვასილის ბოტოპულოსი და ვიცეკანცლერი სასწავლო დარგში სიუზი მიხაილიდისი ეწვივნენ სტუმრად. სკოლის ადმნისისტრაციასა და უნივერსიტეტის წარმომადგენლებს შორის გამართული შეხვედრის შემდეგ სტუმრებმა “ევროპული სკოლის“ დამამთავრებელი კლასის მოსწავლეებს წარუდგინეს “ვებსტერის უნივერსიტეტის“ ათენის კამპუსის შესახებ ინფორმაცია. გააცნეს უნივერსიტეტში არსებული აკადემიური შემოთავაზებები. ვიზიტორებმა “ვებსტერის უნივერსიტეტიდან“ დაათვალიერეს “ევროპული სკოლა“ და მოინახულეს სხვადასხვა ლაბორატორიები.

წიგნის საჯაროდ კითხვის დღე მსოფლიოში ცნობილი ღონისძიებაა, რომელსაც ყოველწლიურად 100-ზე მეტ ქვეყანაში აღნიშნევენ და ხმამაღლა კითხულობენ წიგნის მოყვარულები. “იკითხე ხმამაღლა, შეცვალე მსოფლიო!“-ამ დევიზით “ევროპული სკოლის“ მოსწავლეების მიზანია შეუერთდეს სასარგებლო ინიციატივას და გახდეს მსოფლიოს ამ მასშტაბური ღონისძიების ნაწილი. მოსწავლეებმა ქართულ და ინგლისურ ენაზე წაიკითხეს, როგორც საბავშვო ლიტერატურის კლასიკოსი მწერლების შემოქმედება, ასევე საკუთარი პოეტური და პროზაული ნაწარმოებები.

“ევროპულ სკოლას“ სამუშაო ვიზიტით “განათლების ხარისხის განვითარების ეროვნული ცენტრის“ დირექტორის მოადგილე ბ-ნ კახა ერაძე დელეგაციასთან ერთად ეწვია. გაიმართა საქმიანი შეხვედრა სკოლის დირექტორთან და IB პროგრამის ხელმძღვანელთან, სადაც ისაუბრეს განათლების ხარისხსზე, CIS სტანდარტზე “ევროპულ სკოლაში“ და IB პროგრამების თავისებურებებზე. “განათლების ხარისხის განვითარების ეროვნული ცენტრის“ წარმომადგენლებმა დაათვალიერეს “ევროპული სკოლის“ ინფრასტრუქტურა, ლაბორატორიები, FabLab-ი, Mac-ის ოთახი, შეხვედნენ მოსწავლეებს და გაეცნენ ინოვაციურ პროექტებს.

”ევროპული სკოლის” საბაზო და საშუალო საფეხურის მოსწავლეები 22 იანვარს სკოლის ბიბლიოთეკაში დაესწრნენ შეხვედრას, რომელზეც მოწვეული იყო კურსდამთავრებულთა ასოციაციის თავმჯდომარე ნანუკა გოგუაძე. მოსწავლეებმა შეკითხვები დაუსვეს სტუმარს და საინტერესო რჩევებიც მიიღეს სამომავლო კარიერის შესახებ. ქართული პროგრამის კოორდინატორ ინგა თოლორაიას პროექტი-წარმატებულ კურსდამთავრებულებთან შეხვედრა მიზნად ისახავს სკოლის მოსწავლეთა დაკავშირებას სხვადასხვა დარგში წარმატებულ კურსდამთავრებულებთან, რომლებიც მზად არიან, ურჩიონ მოსწავლეებს, როგორ გაართვან თავი სირთულეებს და ნაყოფიერად გაატარონ სკოლის თუ შემდგომი წლები. ნანუკა გოგუაძე ისევე, როგორც სხვა კურსდამთავრებულები, რომლებიც საზღვარგარეთ სწავლობენ და მუშაობენ, არის სკოლის ერთგვარი ელჩი, რომელიც გამოთქვამს მზაობას ჩაერთოს და წვლილი შეიტანოს სკოლის ცხოვრებაში. იგი წელს ნიუ იორკის უნივერსიტეტის სტერნის ბიზნეს სკოლის საბაკალავრო პროგრამებს ამთავრებს ფინანსებისა და მენეჯმენტის მიმართულებებით, ასევე მეორად სპეციალობას ეუფლება ფსიქოლოგიის განხრით. ნანუკა ზაფხულში ფორბსის სტიპენდიანტი გახდა, რამდენიმე თვის წინ კი, პრაქტიკული გამოცდილების შეძენის მიზნით, მუშაობა დაიწყო გაეროს ეკონომიკისა და ფინანსების კომიტეტში. კურსდამთავრებულთა ასოციაციის თავმჯდომარემ გაიხსენა სასიამოვნო მომენტები სკოლის ცხოვრებიდან, ყურადღება გაამახვილა ისეთ სასკოლო გამოცდილებებზე, რომლებიც განსაკუთრებით ღირებული აღმოჩნდა უნივერსიტეტის წლებში თუ სამსახურეობრივი საქმიანობისას, მან ასევე სამომავლო გეგმები გაანდო მოსწავლეებს და საინტერესო რჩევებიც მისცა მათ. დამსწრეებმა სტუმარს მრავალი შეკითხვა დაუსვეს და დიდი ინტერესიც გამოხატეს რესპოდენტის მონათხრობის მიმართ. ასეთი ტიპის შეხვედრები უსათუოდ გადაიქცევა მარცვლად, რომელიც მოსწავლეთა მოტივაციას მნიშვნელოვნად გააღვივებს.

27 დეკემბერს ”ევროპულ სკოლაში” კურსდამთავრებულთა შეხვედრა გაიმართა. წელს, ამ ღონისძიების დამახასიათებელი ტრადიციული აქტივობების გარდა, შედგა ინფორმაციული შეხვედრა მაღალი კლასის მოსწავლეებთან, სადაც კურსდამთავრებულებმა თავიანთი ცხოვრებისეული გამოცდილებით და მიღწევებით მოტივაცია აუმაღლეს სკოლის მოსწავლეებს. შეხვედრის მონაწილეებისთვის საინტერესო აღმოჩნდა კურსდამთავრებულთა ყოველდღიური ყოფის, გამოწვევებისა და წარმატების მიღწევის გზების გაცნობა. უფროსმა მეგობრებმა დახმარება აღუთქვეს მოსწავლეებს საუნივერსიტეტო მზადების გამოწვევების დასაძლევად და სკოლასთან თანამშრომლობის გაღრმავების მზაობაც გამოთქვეს. საღამოს საზეიმო შეხვედრა გაგრძელდა სადღესასწაულოდ მორთულ გარემოში, სადაც მეგობრული ღიმილით ხვდებოდა თითოეული დამხვედრი უკვე სტუმრად მოსულ კურსდამთავრებულებს. მასწავლებლებისა და ხელმძღვანელების თბილმა მიმართვებმა, ყოფილი თანაკლასელების, მონატრებული დამრიგებლების ნახვამ, ლამაზი მოგონებების გაზიარებამ ამ საღამოს დაუვიწყარი ელფერი შესძინა.

“ევროპული სკოლის“ ქართული პროგრამის საბაზო და საშუალო საფეხურის მოსწავლეებმა განსაკუთრებულად აღნიშნეს ახალი წლის მოახლოება. საბაზო საფეხურის მოსწავლეებმა შეასრულეს სასიმღერო და საცეკვაო ნომრები მე-7,8 და 9 კლასელებმა მოამზადეს წლის შემაჯამებელი ვიდეო. მოაწყეს გასართობი თამაშები და კარაოკე/დისკოთეკა. საშუალო საფეხურის მოსწავლეებმაც მოამზადეს სადღესასწაულო ნომრები, იცეკვეს, იმღერეს მიულოცეს პედაგოგებსა და თანატოლებს ახალი წლის დღესასწაული, გამართეს გასართობი თამაშები და იცეკვეს დიჯეის მუსიკის თანხლებით.

“ევროპული სკოლის” თანამშრომლებს 27 დეკემბერს გადაეცა სკოლის ადმინისტრაციის მიერ სპეციალურად მომზადებული საახალწლო საჩუქრები, მოგვიანებით კი თანმშრომლები სკოლის სააქტო დარბაზში შეიკრიბნენ Secret Santa-ს საჩუქრების მისაღებად. საჩუქრების გახსნის და Secret Santa-ს გამოცნობის პროცესი სახალისო აღმოჩნდა თითოეული მოთამაშისთვის და მისცა საშუალება თანამშრომლებს, უფრო უკეთ გაეცნოთ ერთმანეთი.

ქართული პროგრამის დაწყებითი კლასის მოსწავლეთა სადღესასწაულო წარმოდგენები გრძელდება. 24 დეკემბერს მე-4 ბ კლასმა წარმოგვიდგინა საახალწლო სპექტაკლი რუსულად. მე-2 ა,ბ და გ კლასის მოსწავლეებმა გვიჩვენეს სპექტაკლი ,,სათაგური“ და ,,საშობაო ზღაპარი.“ მე-5 კლასელებმა კი ცნობილი სადღესასწაულო სიმღერები შეასრულეს. მოსწავლეებმა უკვე შექმნეს საახალწლო განწყობა და მოსულ სტუმრებს გაუზიარეს სითბო და სიყვარული.