31 ოქტომბერს “ევროპული სკოლის“ მოსწავლეებმა ჰელოუინი განსაკუთრებული განწყობით აღნიშნეს: სკოლაში ნაირფეროვან კოსტიუმებში გამოწყობილები მოვიდნენ, მოხატეს გოგრები, სადღესასწაულოდ მორთეს დერეფნები და საკლასო ოთახები, ითამაშეს სახალისო თამაშები და ტრადიციისამებრ, ტკბილეული აჩუქეს ერთმანეთს. სკოლის ეზოში მოეწყო: თექის ნამუშევრების გამოფენა, ტკბილეულის საქველმოქმედო გამოფენა-გაყიდვა, სკოლის კაფეტერიის გუნდისა და მსოფლიო კულინარიის კლუბის მიერ მომზადებული ჰელოუინის თემატური ტკბილეულის დეგუსტაცია. წვეულება სადღესასწაულო კოსტიუმების ჩვენებით დასრულდა. ხალისიანმა განწყობამ სრულად მოიცვა სკოლის შენობა, დიდი თუ პატარა.

“ევროპული სკოლის“ ჰიპ-ჰოპის კლუბის მოცეკვავეებმა “ახალგაზრდა შემოქმედთა ფედერაციის“ ორგანიზებით გამართულ “ART ფესტივალზე" წლის საუკეთესო მოცეკვავეებისა და ლაურეატის წოდება მოიპოვეს. კონცერტი 23 ოქტომბერს “პროფკავშირების კულტურის ცენტრში“ გაიმართა და ჩვენი სკოლის მოსწავლეებმა ორი საცეკვაო ნომერი განსაკუთრებული ოსტატობით წარმოადგინა. თანამედროვე ცეკვის სტუდიას კ. მარჯანიშვილის თეატრის მსახიობი და დამდგმელი ქორეოგრაფი თემურ ქამხაძე ხელმძღვანელობდა. 

27 ოქტომბერი “დედა ენის“ავტორის, საბავშვო მწერლის, პუბლიცისტის, მეცენატისა და საზოგადო მოღვაწის იაკობ გოგებაშვილის დაბადების დღეა. ამ თარიღთან დაკავშირებით მოსწავლეებმა უმასპინძლეს თანამედროვე “დედა ენის“ შემდგენელსა და საბავშვო მწერალს ნესტან კუპრავას, რომელმაც ისაუბრა მწერლის ცხოვრებისა და შემოქმედების შესახებ, გააცნო მოსწავლეებს ფერადი მარცვლებით კითხვის შესწავლის მეთოდიკა. მოსწავლეებმა “დედა ენის“ ილუსტრაციების მიხედვით გამოძერწეს ფიგურები, განასახიერეს პერსონაჟები მისი მოთხრობებიდან: “თხა და გიგო,“ “მკვეხარა ქოთანი,“ “უსუნო ყვავილი“, პირეველკლასელებს კი საჩუქრად გადაეცათ “დედა ენა“ სამუშაო რვეულებთან ერთად.

კლიმატის ცვლილება თანამედროვეობის უდიდესი გამოწვევაა. პლანეტის თითოეული ადამიანი უნდა ჩაებას გარემოსდაცვით მოძრაობაში ბუნების გადასარჩენად და უკეთესი მომავლის უზრუნველსაყოფად. “ევროპული სკოლის“ მოსწავლეებმა 22-23 ოქტომბერს მონაწილეობა მიიღეს ევროპის ახალგაზრდული პარლამენტის მიერ გამართულ, კლიმატის ცვლილებისადმი მიძღვნილ  კონფერენციაში: #EYPinAction, რომლის მეორე დღეც გარემოსდაცვით,“მწვანე“ აქტივობებს დაეთმო.

“ევროპული სკოლის“ მშობელთა და მასწავლებელთა ასოციაცია არის დამატებითი შესაძლებლობა მშობლებისთვის, ითანამშრომლონ სკოლასთან  და მიაღწიონ საერთო მიზანს, რომელიც მოსწავლეთა წარმატების ხელშეწყობასა და საუკეთესო სასკოლო გამოცდილების შეთავაზებას ემსახურება.

ხელების დაბანის საერთაშორისო დღესთან დაკავშირებით : ევროპული სკოლის" მოსწავლეებს “ამერიკული ჰოსპიტალი თბილისის" ინფექციის კონტროლისა და პრევენციის დირექტორი ირმა კენჭიაშვილი შეხვდა და ხელების საპნით დაბანის, როგორც დაავადებისგან თავდაცვის ეფექტური საშუალების, შესახებ ესაუბრა. მოსწავლეებმა მონაწილეობა მიიღეს სახალისო აქტივობებში და საინფორმაციო ბუკლეტების გაცნობით გაიმდიდრეს ცოდნა ჰიგიენის დაცვის შესახებ. ცნობიერების ამაღლების მიზნით, სკოლის ექიმის ჩართულობით, ინფორმაციული ხასიათის შეხვედრები და ფილმების ჩვენება გაიმართა დაწყებით კლასებში.

პროექტის ფარგლებში “ხელოვნების კულტურათაშორისი სწავლება“, “ევროპულ სკოლას“ ეწვია დელეგაცია, რომლის შემადგენლობაში შედიოდნენ ციურიხისა და ლუცერნის ხელოვნების ინსტიტუტების, ილიას სახელმწიფო უნივერსიტეტისა და განათლების სამინისტროს წარმომადგენლები. პროექტის მიზანია მომავალი ხელოვნების მასწავლებელების პროფესიული გამოცდილების გამდიდრება, სკოლებში ხელოვნების სწავლების ადვოკატირება და საქართველო-შვეიცარიის კულტურული კავშირების გაღრმავება.

1 ოქტომბერს ილიას სახელმწიფო უნივერსიტეტის “ილიაუნის“  ეზოში “ილიაუნის სამეცნიერო პიკნიკი“-2022  გაიამართა, სადაც “ევროპული სკოლის“ სტენდიც მოეწყო და  ვიზიტორებს ჰქონდათ შესაძლებლობა დაეთვალიერებინათ ინდუსტრიული  რობოტი Botley; რობოტი mBot; რობოტის ხელი DOBOT; დაეხატათ 3D კალამებით და ჩაეტარებინათ ქიმიური ცდები.

“ევროპულმა სკოლამ“ კვირას, 2 ოქტომბერს მოსწავლეებისა და მასწავლებლებისთვის ლისის ტბაზე გამართა სკოლის დაარსებიდან 15 წლისთავისადმი მიძღვნილი    მარათონი. მარათონის მონაწილეებისთვის ეს დღე იქცა სკოლის სიყვარულის, ერთგულების, ერთიანობის  დემონსტრირების საშუალებად.  სასიამოვნო ამინდმა, ლამაზმა ხედებმა,   სახალისო შეჯიბრმა განწყობა აუმაღლა დიდსა თუ პატარას, მასწავლებელსა თუ მოსწავლეს.