მოსწავლეთა მხარდაჭერის ცენტრის ეგიდით ევროპულ სკოლაში დაიწყო შეხვედრების ციკლი, რომელიც მიზნად ისახავს ფსიქოლოგს, მასწავლებლებსა და მოსწავლეებს შორის კომუნიკაციის ეფექტურობის ამაღლებას. 5 სექტემბერს ჩატარდა სკოლის ფსიქოლოგის, ქალბატონი ქეთი ოსიაშვილის, შეხვედრა დაწყებითი კლასების მასწავლებლებთან, თემაზე ,, ფსიქოლოგისა და მასწავლებლის ურთიერთობის ფორმები’’.

ჩვენი ბაღის მოსწავლეებში ჯანსაღი კვების ჩვევების გამომუშავებაზე ევროპული სკოლის შეფ-მზარეულ გიორგისთან ერთად ვმუშაობთ. გიორგი პატარებს ესაუბრა ყოველდღიურ რაციონში ხილ-ბოსტნეულის ჩართვის აუცილებლობასა და მათ სასარგებლო თვისებებზე. ბავშვები დიდი ინტერესით უსმენდნენ მის რჩევებს და აქტიურად უსვამდნენ კითხვებს. ამის შემდეგ, გიორგიმ პატარებთან ერთად ხილისა და ბოსტნეულისაგან სხვადასხვა სახალისო კომპოზიციები შექმნა, რომელთაც მათი დიდი მოწონება დაიმსახურეს. შეხვედრის დასასრულს, მათ ერთად დააგემოვნეს ჯანსაღი და გემრიელი ნამუშევრები. ბავშვებმა ერთხმად გადაწყვიტეს, რომ დღეიდან უფრო ხშირად მიირთმევენ ხილსა და ბოსტნეულს.

2 ოქტომბერს ჩვენმა სკოლამ უმასპინძლა ა.შ.შ.-ს უნივერსიტეტების - Franklin and Marshall College და Worcester Polytechnic Institute-ის წარმომადგენლებს. ევროპული სკოლის მოსწავლეები ჩაერთნენ საინტერესო დისკუსიაში სტუმრებთან და მიიღეს ამომწურავი ინფორმაცია მოცემულ კოლეჯებში მიღების პროცესის შესახებ. ჩვენი საერთაშორისო ბაკალავრიატის პროგრამის მოსწავლეებმა შეიტყვეს, რომ IB პროგრამის სწავლების მაღალი სტანდარტების წყალობით ეძლევათ პრივილეგია, გამონაკლისის სახით დაამთავრონ Franklin and Marshall College სულ რაღაც 3 წელიწადში, რაც ზოგადად, არცთუ მარტივი მისაღწევია ა.შ.შ.-ს უნივერსიტეტებში. Worcester Polytechnic Institute, რომელიც ერთ-ერთ წამყვან STEM პროფილის უნივერსიტეტად ითვლება, განსაკუთრებით საინტერესო აღმოჩნდა ევროპული სკოლის, როგორც STEM მიმართულებაზე ორიენტირებული სკოლის, მოსწავლეებისათვის.

შაბათს, 29 სექტემბერს, ევროპული სკოლა წარმოდგენილი იყო თბილისის საბავშვო ფესტივალზე მთაწმინდის პარკში. ფესტივალის სტუმრებმა მიიღეს ინფორმაცია საბავშვო სფეროში არსებულ სიახლეებზე სხვადასხვა მიმართულებით, მათ შორის საგანმანათლებლო სფეროში.

შაბათს, 29 სექტემბერს, ილიაუნის სამეცნიერო პიკნიკზე ჩვენი სკოლის კარავში წარმოდგენილმა სახალისო ტექნოლოგიებმა ვიზიტორების დიდი ინტერესი გამოიწვია. ლეგო რობოტები, მფრინავი პროგრამირებადი დრონები, 3D კალამი და ელექტრობის სახალისო ექსპერიმენტები მთელი დღის მანძილზე იზიდავდა ცნობისმოყვარე დამთვალიერებლებს !

25 სექტემბერს ეროვნულ სამეცნიერო ბიბლიოთეკაში გამართულ ღონისძიებაზე ჩვენმა მოსწავლეებმა წარმოადგინეს სმარტ რობოტები და დამსწრეების დიდი მოწონება დაიმსახურეს.

ახალი სასწავლო წლის გასვლითი ღონისძიებები ჩვენი ამერიკული სექტორის მოსწავლეებისთვის ჯომარდობის ტურით დაიწყო. მე-8, მე-9, მე-10 და მე-11 კლასელები სათავგადასავლო კლუბ “ ჯომარდს“ ეწვივნენ არაგვის ხეობაში და ჯომარდობის გარდა, საკუთარი შესაძლებლობები სათავგადასავლო პარკშიც გამოსცადეს სხვადასხვა სირთულის გზებზე.

28 სექტემბერს ევროპულ სკოლას ბოსტონის უნივერსიტეტის მიღების სამსახურის წარმომადგენელი Liam McCartney ეწვია. ჩვენი სკოლის სამივე პროგრამის მოსწავლეებს შესაძლებლობა მიეცათ, დასწრებოდნენ ინფო-სესიას, სადაც მათ მოისმინეს ძალიან ღირებული და სასარგებლო რჩევები ბოსტონის უნივერსიტეტში სწავლის მსურველთა აპლიკაციების განხილვისა და შერჩევის პროცესის შესახებ.

პარასკევს, 28 სექტემბერს, ჩვენი სკოლის ახალი მოსწავლეების მშობლებისათვის სასიამოვნო საღამო მოეწყო. შეხვედრაზე მათ შესაძლებლობა მიეცათ, უფრო ახლოს გაეცნოთ ერთმანეთი, სკოლის მმართველი გუნდი და მშობელთა და მასწავლებელთა ასოციაციის თავმჯდომარეები. აკადემიურმა დირექტორმა, პროგრამის კოორდინატორებმა და მშობელთა და მასწავლებელთა ასოციაციის თავმჯდომარეებმა მშობლებს მიაწოდეს ინფორმაცია მათი ჩართულობის შესაძლებლობების შესახებ. არაფორმალურ, სასიამოვნო გარემოში ჩატარებული შეხვედრა ტორტის გაჭრის ცერემონიით დასრულდა.