ამერიკული უმაღლესი სკოლის მოსწავლეები, კერძოდ ორი კურსის AP Comparative Government and Politics (XII კლასი) და AP European History-ს (X-XII კლასები) მსმენელები, სასწავლო მიზნებით ესტუმრნენ საქართველოს ეროვნულ მუზეუმს; დაათვალიერეს საბჭოთა ოკუპაციის მუზეუმი; საგნის მასწავლებელმა ნათია ფიფიამ მათ წაუკითხა მინი-ლექცია ეროვნულ-განმათავისუფლებლი მოძრაობისა და ქართველი საბჭოთა დისიდენტების შესახებ; მოსწავლეებმა დაათვალიერეს ძველი ქართული იარაღის და ტანისამოსის გამოფენა. თვალსაჩინო მასალის საფუძველზე მათ იმსჯელეს ისტორიის რეკონსტრუქციისას ეთნოლოგიური მასალის გამოყენების მეთოდებზე. გარდა ამისა, მოსწავლეები ესტუმრნენ პალეოლითის ხანის ამსახველ გამოფენას და გაეცნენ ადამიანის ევოლუციის ძირითად ეტაპებს.

18 დეკემბერს ქართული პროგრამის მე-8 კალსებში ჩატარდა ინტერდისციპლინური პროექტის” ვჭამთ იმისთვის, რომ ვიცოცხლოთ, თუ ვცოცხლობთ იმისთვის, რომ ვჭამოთ?”  შემაჯამებელი გაკვეთილი. პროექტს ახორციელებდნენ ბიოლოგიის პედაგოგი მანანა ჟამურაშვილი და რუსული ენის პედაგოგი ირინა გამსახურდია. პროექტის ფარგლებში მოსწავლეებმა აწარმოეს კვლევა, აიღეს ინტერვიუები, მოამზადეს პრეზენტაციები და მოხსენებები. ამ პროცესს მოსწავლეების მხრიდან დიდი დაინტერესება და გამოხმაურება მოჰყვა. 

”ევროპული სკოლა” აგრძელებს საქველმოქმედო აქციებს შეზღუდული შესაძლებლობების მქონე ბავშვების მხარდასაჭერად. 15 დეკემბერს სკოლამ მოაწყო საახალწლო საქველმოქმედო ბაზრობა ”გაეცი სიყვარულით”, რომელშიც სკოლის მთელმა საზოგადოებამ და პარტნიორმა ორგანიზაციებმა -საქართველოს წითელი ჯვრის ასოციაცია, სოციალური საწარმო “ბაბალე“ , ორგანიზაცია "მშობელთა ხიდი", მიიღეს მონაწილეობა. მასწავლებლებმა, მოსწავლეებმა და მათმა მშობლებმა ხელნაკეთი ნივთები და სახლში მომზადებული ტკბილეული გამოფინეს სკოლის ეზოში. ცივმა ამინდმა, მაგრამ თბილმა გრძნობებმა, ცხელმა შოკოლადმა, მშვენიერმა ნაკეთობებმა, მუსიკალურმა ნომრებმა, საახალწლო განათებამ სულ სხხვაგვარი შუქით აღავსო შეზღუდული შესაძლებლობების მქონე მოზარდთა – პარაორკესტრის მუსიკოსების – თვალები. ამ შუქმა და სიყვარულით სავსე გარემომ, რომელშიც დიდი ენთუზიაზმი ჩადო ”ევროპული სკოლის” საზოგადოებამ, მართლაც რომ განსაკუთრებული ელფერი შესძინა საქველმოქმედო ღონისძიებას, რომლის ნაწილიც გახდა თითოეული ჩვენგანი იმ საღამოს.

მიმდინარე წლის 16-17 დეკემბერს თბილისში (სასტუმრო “ჰოთელს პრეფერენს ჰუალინგ თბილისი“) ჩატარდა რიგით IV საქართველოს საგანმანათლებლო ტექნოლოგიების კონფერენცია, რომელიც მიზნად ისახავდა ტექნოლოგიების სფეროში მიმდინარე თანამედროვე ტენდენციების შესახებ დაინტერესებული მხარეების ინფორმირებას, ტექნოლოგიების სასწავლო პროცესში გამოყენების საუკეთესო პრაქტიკისა და გამოცდილების გაცნობასა და გაზიარებას მასწავლებლებს, ექსპერტებს, უნივერსიტეტის წარმომადგენლებსა და საგანმანათლებლო ტექნოლოგიების სფეროში მოღვაწე ორგანიზაციებს შორის.

11 დეკემბერს ივანე ჯავახიშვილის სახელობის თბილისის სახელმწიფო უნივერსიტეტმა, საქართველოს გერმანული ენის მასწავლებელთა ასოციაციის თანამონაწილეობით, გამართა ესეების კონკურსი. ღონისძიების მიზანი გახლდათ ქართულ-გერმანული ურთიერთობების მრავალფეროვნების წარმოჩენა და აღნიშნული თემატიკით ახალგაზრდა ავტორების, მოსწავლეებისა და სტუდენტების დაინტერესება.

დეკემბრის თვეში მოეწყო საგანმანათლებლო ექსკურსია თავისუფალ უნივერსიტეტში. მოსწავლეებმა დაათვალიერეს უნივერსიტეტის ბიბლიოთეკა, მუზეუმი და ქიმიის, ფიზიკისა და ინჟინერიის ლაბორატორიები. ამ ღონისძიებაში მონაწილეობდნენ 8ა და 8ბ კლასების მოსწავლეები და მათი პედაგოგები ხათუნა კაპანაძე, ზურაბ ბერია და ირინა კოჭლამაზაშვილი.

გასულ წელს ”ევროპული სკოლის” ისტ-ის პედაგოგმა დავით ნოზაძემ მოსწავლეები ჩართო eTwinning-ის პროექტში” ვეწვიოთ მეორე ქვეყანას”. გუნდი, რომლის წევრებიც იყვნენ მოსწავლეები: ელენე ჯოხაძე, ელენე ფანჯაკიძე, ლიზა კვიჟინაძე, მარიამ ოქრიაშვილი, სალომე ზედგენიძე და თორნიკე ყუბანეიშვილი, დაუმაგობრდა საბერძნეთის ერთ-ერთი სკოლის გუნდს. პროექტის ფარგლებში, მოსწავლებს მიეცათ შესაძლებლობა, გაცნობოდნენ საბერძნეთის ისტორიულ-კულტურულ ღირსშესანიშნაობებს; განევითაებინათ 21-ე საუკუნის უნარები; გაეზიარებინათ ინფორმაცია უცხოელი თანატოლებისთვის პრეზენტაციების, ვიდეოების, ვიდეოკონფერენციების საშუალებით , სადაც საკომუნიკაციო ენად იყენებდნენ ინგლისურს; შეედგინათ ტურისტული მარშრუტი და განრიგი; გაეცნობიერებინათ საქართველოს ეკონომიკისთვის ტურიზმის მნიშვენელობა და რაც მთავარია, შეეძინათ ახალი მეგობრები. ცოტა ხნის წინ ”ევროპული სკოლის” პროექტი ევროპის ხარისხის ნიშნით დაჯილდოვდა.

14 დეკემბერს ”ევროპული სკოლის” მოსწავლეებმა მონაწილეობა მიიღეს ქართული ენის პედაგოგის ლელა მელიქიშვილის მიერ ინიცირებულ დისკუსიაში მოზარდთა ძალადობის შესახებ.ილმარ რააგის ფილმის ”კლასი” ჩვენების შემდეგ ხანგრძლივი დისკუსია გაიმართა მასწავლებლების, მშობლების და მოსწავლეების მონაწილეობით. დაისვა კითხვები: ”რატომ ხდება ეს ყველაფერი?” ”რა იწვევს ძალადობას?” ”როგორ ავიცდინოთ თავიდან მოზარდთა ძალადობის ფაქტები?” მოზარდობის პროცესები უფრო მშვიდად წარიმართება, თუ მშობლებს ახლო ურთიერთობა, ხშირი საუბრები ექნებათ ბავშვებთან, თუ მასწავლებლები , თანატოლები არ იქნებიან გულგრილნი მოზარდთა კონფლიქტების მიმართ -დაასკვნეს მოსწავლეებმა.

საერთაშორისო ბაკალავრიატის საბაზო (MYP) და სადიპლომო პროგრამის (DP) მოსწავლეები ჩაერთვნენ გაეროს 16-დღიან კამპანიაში, რომელიც მიმართულია გენდერული ძალადობის წინააღმდეგ. 2017 წლის კამპანიას ეწოდება: “გახადე მსოფლიო ნარინჯისფერი. არავინ დატოვო უყურადღებოდ. შეწყვიტეთ ძალადობა ქალებისა და გოგონების წინააღმდეგ!“ ძალადობის წინააღმდეგ MYP-სა და DP-ს მოსწავლეებმა ერთობლივი ვიდეო გადაიღეს, რომელშიც თავიანთ მშობლიურ ენებზე დაგმეს ძალადობა ქალების წინააღმდეგ, რათა მათი მესიჯი მსოფლიოს ნებისმიერი კუთხისთვის გასაგები ყოფილიყო.