2018 წლის 15 თებერვალს მე-6 ა კლასის მოსწავლეები ბუნების პედაგოგ მანანა ჟამურაშვილთან ერთად იმყოფებოდნენ არასამთავრობო ორგანიზაციაში "კავშირი მდგრადი განვითარებისათვის - ეკოხედვა“, სადაც “ევროპული სკოლის“ მოსწავლეებს ტრენინგი ჩაუტარდათ. ტრენინგის ძირითადი თემა იყო ბიომრავალფეროვნება. შეხვედრა მოიცავდა როგორც თეორიულ სწავლებას, ისე - სახალისო შემეცნებით თამაშებს. ტრენინგის ბოლოს, მოსწავლეებს გადაეცათ “ეკოხედვის“ მიერ მომზადებული და გამოცემული საბავშვო, გარემოსდაცვითი წიგნები და ჟურნალები.

14 თებერვალს “ევროპულმა სკოლამ“ სიყვარულის დღე, ვალენტინობა, აღნიშნა. პირველკლასელებმა სკოლის სამზარეულოში გულის ფორმის ორცხობილები გამოაცხვეს და თანატოლებს გაუმასპინძლდნენ. ანგელოზის ფორმაში გამოწყობილმა პირველკლასელებმა სკოლის შესასვლელში სიყვარულის ისრები დაარიგეს.aA

13 თებერვალს ქართული პროგრამის მე-6 ბ კლასის მოსწავლეები, პედაგოგ მანანა ჟამურაშვილის თანხლებით, იმყოფებოდნენ გარემოსდაცვითი ინფორმაციისა და განათლების ცენტრში, სადაც განათლების პროექტების სამსახურის წარმომადგენელმა მარიამ არჩვაძემ გააკეთა პრეზენტაცია თემაზე:"საქართველოს ბიომრავალფეროვნება და დაცული ტერიტორიები".

9 თებერვალს, “ევროპული სკოლის“ ქართული ენისა და ლიტერატურის მასწავლებელმა თამარ ცაგარელმა და ევროპული სკოლის მე-5ა და მე-5ბ კლასის მოსწავლეებმა ეკატერინე გაბაშვილის “მაგდანას ლურჯას“ თითქმის ყველა გამოცემა გადაფურცლეს, წაიკითხეს, იმსჯელეს. ESTV-ის ხელმძღვანელმა ირაკლი ჯაოშვილმა ბატონ რ. ჩხეიძისა და თ. აბულაძის “მაგდანას ლურჯაზე“ დააფიქრა მოსწავლეები და კინოხელოვნების იმ ხერხებზე ესაუბრა, რომლებიც ლიტერატურული ნაწარმოების ეკრანიზაციისას გამოიყენება.

2018 წლის 9 თებერვალს “ევროპული სკოლის“ X-XI კლასების მოსწავლეებმა და მათმა პედაგოგებმა მაია მელიქიშვილმა და მაია წენგუაშვილმა თბილისის სახელმწიფო უნივერსიტეტის დაარსების 100 წლის იუბილე კონფერენციით აღნიშნეს. მომხსენებლებმა დამსწრე საზოგადოებას მოუთხრეს იმის შესახებ, თუ რა რთულ ვითარებაში მოუხდა ქართველი ერის იმდროინდელ მოწინავე საზოგადოებას პირველი ქართული უნივერსიტეტის დაარსება.

შუამდინარეთის ცივილიზაციების შესწავლისას, მე-7ა კლასის მოსწავლეებმა ლურსმულ დამწერლობასაც აუღეს ალღო. “ევროპული სკოლის“ ისტორიის მასწავლებელმა მანანა შეყილაძემ გაკვეთილზე მოსწავლეებს შუმერების მიერ შექმნილი ლურსმული ანბანი, მისი ქართული შესატყვისები და თიხა დაურიგა; მოსწავლეებმა თიხის გუნდისგან ფირფიტები დაამზადეს და ფირფიტაზე საკუთარი სახელები და გვარები ქართულად და ლურსმული ასოებით ამოკვეთეს.

"ევროპული სკოლის" პედაგოგებმა, მარინა მელიქიძემ და მაია ჯოხაძემ, ქართული პროგრამის მე-5 კლასის მოსწავლეებისთვის ჩაატარეს გაკვეთილი - "მე XXI საუკუნის მოსწავლე ვარ".გაკვეთილის მიზანი იყო, ინფორმაციული ტექნოლოგიების გამოყენების საშუალებით, მოსწავლეებს შეექმნათ ციფრული მასალა და შეეფასებინათ სპეციალური კრიტერიუმებით.

9 თებერვალს “ევროპულმა სკოლამ” კანტის აკადემიასთან თანამშრომლობის მემორანდუმი გააფორმა. მემორანდუმის ფარგლებში, სკოლაში 9-12 წლის მოზარდებისთვის გაიხსნა აინშტაინის საკვირაო სკოლა, სადაც მოსწავლეები განივითარებენ კრეატიული აზროვნების, ლიდერობის და კომუნიკაციის უნარებს. მემორანდუმის ხელმოწერის ცერემონიალზე აკადემიის წარმომადგენლებმა პროექტის დეტალები გააცნეს მოზარდებსა და მათ მშობლებს. შეხვედრის დასასრულს საკვირაო სკოლის მომავალმა მოსწავლეებმა ალბერტ აინშტაინის ფორმაში გამოწყობილ თანატოლთან ერთად სამახსოვრო ფოტოებიც გადაიღეს.

2017 წლის ნოემბრიდან ბრიტანეთის საბჭო წარმოადგენს “ევროპული სკოლის“ ოფიციალურ პარტნიორს და ქართულ პროგრამაში ინგლისური ენის სწავლა-სწავლების ბრიტანული მოდელის დანერგვას უწყობს ხელს. 2018 წლის 9 თებერვალს ბრიტანეთის საბჭოს დირექტორი, ზაზა ფურცელაძე, თავისი გუნდის წევრებთან ერთად, “ევროპული სკოლის“ მშობლებს შეხვდა. შეხვედრა ინტერაქციულ რეჟიმში წარიმართა- ბრიტანეთის საბჭოს წარმომადგენლებმა მშობლებს არსებული სიტუაცია და სამომავლო გეგმები გააცნეს და მათთვის საინტერესო შეკითხვებსაც უპასუხეს.