23 თებერვალს “ევროპულ სკოლაში” ჩატადა სამეცნიერო-პრაქტიკული კონფერენცია “კიბერუსაფრთხოების მომავალი ექსპერტი”, რომელზეც კიბერუსაფრთხოების ექსპერტებთან ერთად მოხსენებები “ევროპული სკოლის” მოსწავლეებმაც გააკეთეს. კონფერენციაზე წარმოდგენილ თემებს პრაქტიკული მნიშვნელობა ჰქონდა მასწავლებლებისა თუ მოსწავლეებისთვის. პერსონალური მონაცემების დაცვა, ონლაინ სივრცეში მოქმედების ეთიკა, მოზარდების უსაფრთხოება კიბერსივრცეში, მომავლის პროფესიები - ეს დღევანდელობის აქტუალური საკითხებია და რჩევებს ამ მიმართულებით უთუოდ დიდი მნიშვნელობა აქვს თანამედროვე საზოგადოების თითოეული წევრისთვის. ამავე დღეს “ევროპულ სკოლასა” და კიბერუსაფრთხოების სამეცნიერო ასოციაციას შორის თანამშრომლობის მემორანდუმიც გაფორმდა.

კლასიკური მუსიკის ფესტივალი “ევროპულ სკოლაში“ დირიჟორ მირიან ხუხუნაიშვილის მიერ მოსწავლეთათვის ჩატარებული მასტერკლასით დაიწყო. ახალგაზრდა დირიჟორმა სადირიჟორო ჯოხის “ჯადოსნური“ შესაძლებლობები გააცნო მოზარდებს და მისცა საშუალება, თავი მოესინჯათ სადირიჟორო პულტთან. ამ შემოთავაზებას სიხარულით შეხვდნენ გამოუცდელი “დირიჟორები“ . ორკესტრმა რამდენიმე პოპულარული კლასიკური მუსიკალური ნაწარმოები შეასრულა მოსწავლეთა დირიჟორობით. მირიან ხუხუნაიშვილის საჩუქარი- სადირიჟორო ჯოხი კი ერგო გამარჯვებულ მოსწავლეს PYP მე-5 კლასიდან, ნიკო გერსამიას.

21 თებერვალს ,,ევროპული სკოლის“ მე-6 ბ კლასის მოსწავლეები ისტორიის პედაგოგ მაია წენგუაშვილთან ერთად იმყოფებოდნენ საქართველოს ეროვნულ მუზეუმში. ექსკურსიის მიზანი გახლდათ, მოსწავლეთა მიერ საქართველოს ტერიტორიაზე არსებული პრეისტორიული და ანტიკურ-ელინისტური პერიოდის მახასიათებლების შეჯამება და ასევე, მოსწავლეებში დაკვირვების, კვლევის, საკუთარი აზრის, ჩანახატების, ჩანაწერების გაკეთების და პრეზენტაციაზე დამოუკიდებლად მუშაობის უნარ-ჩვევების განვითარება.

21 თებერვალი მშობლიური ენის საერთაშორისო დღეა. ამ დღეს ყოველწლიურად აღნიშნავს “ევროპული სკოლის“ საზოგადოებაც. სკოლაში 23-ზე მეტი სხვადასხვა ეროვნების მოსწავლე სწავლობს. აქედან გამომდინარე, ენობრივი მრავალფეროვნებაც თვალშისაცემია. მშობლიური ენის საერთაშორისო დღეს მოსწავლეებმა ერთმანეთს მშობლიურ ენაზე ხშირად გამოყენებადი ფრაზები შეასწავლეს, თავიანთი ენების ისტორია, დამწერლობა გააცნეს, მშობლიურ ენაზე შექმნილი პოეზიის შედევრები წაუკითხეს თანატოლებს, მონაწილეობა მიიღეს ხალისიან პერფორმანსებსა და თამაშებში. ამ დღეს არც მშობლები გამოაკლდნენ-დღის ბოლოს თავიანთი ქვეყნების ტრადიციული კერძებით გაუმასპინძლდნენ ღონისძიების დამსწრეთ.

მათემატიკის სწავლების გაუმჯობესებისა და მისი პოპულარიზაციის, კონკურსებში, კონფერენციებსა  და ოლიმპიადებში მოსწავლეების მონაწილეობისათვის მომზადების მიზნით “ევროპულმა სკოლამ“ გადაწყვიტა, დაიწყოს მათემატიკის საშაბათო სკოლა და ჩამოაყალიბოს მათემატიკის წრე. საშაბათო სკოლა იმუშავებს სპეციალურად შედგენილი პროგრამის მიხედვით, რაც ხელს შეუწყობს მოსწავლეებში  აბსტრაქტული და ლოგიკური აზროვნების განვითარებას; მოამზადებს მათ  მათემატიკის წრისათვის. მათემატიკის წრე დაიწყებს მოსწავლეების მომზადებას სხვადასხვა კონკურსისა და ოლიმპიადებისათვის.

პროექტის ფარგლებში “რა ვიცით ილია ჭავჭავაძის შესახებ?“ “ევროპული სკოლის“ პედაგოგმა თამარ ცაგარელმა მე-9 კლასის მოსწავლეებს რუსთაველის სახელმწიფო აკადემიური თეატრის მუზეუმში გასვლითი გაკვეთილი ჩაუტარა. მოსწავლეები გაეცნენ ილია ჭავჭავაძის მოთხრობის “კაცია-ადამიანი?!“ სცენარსა და საარქივო მასალას.

16 თებერვალს დაწყებითი სწავლების საფეხურის მეორეკლასელებმა სკოლის სასადილოში ’Масленица’-ს დღესასწაულთან დაკავშირებით გამოაცხვეს ბლინები და თანატოლებს გაუმასპინძლდნენ. პროცესი ძალიან სახალისო და საინტერესო აღმოჩნდა პატარებისთვის. მოგვიანებით მოზარდებმა სააქტო დარბაზში, რუსული ენის პედაგოგ ნელი ხომერიკის ხელმძღვანელობით, რუსული სიმღერებით დაამშვენეს ’Масленица’-ს დღესასწაული.

2018 წლის 15 თებერვალს მე-6 ა კლასის მოსწავლეები ბუნების პედაგოგ მანანა ჟამურაშვილთან ერთად იმყოფებოდნენ არასამთავრობო ორგანიზაციაში "კავშირი მდგრადი განვითარებისათვის - ეკოხედვა“, სადაც “ევროპული სკოლის“ მოსწავლეებს ტრენინგი ჩაუტარდათ. ტრენინგის ძირითადი თემა იყო ბიომრავალფეროვნება. შეხვედრა მოიცავდა როგორც თეორიულ სწავლებას, ისე - სახალისო შემეცნებით თამაშებს. ტრენინგის ბოლოს, მოსწავლეებს გადაეცათ “ეკოხედვის“ მიერ მომზადებული და გამოცემული საბავშვო, გარემოსდაცვითი წიგნები და ჟურნალები.

14 თებერვალს “ევროპულმა სკოლამ“ სიყვარულის დღე, ვალენტინობა, აღნიშნა. პირველკლასელებმა სკოლის სამზარეულოში გულის ფორმის ორცხობილები გამოაცხვეს და თანატოლებს გაუმასპინძლდნენ. ანგელოზის ფორმაში გამოწყობილმა პირველკლასელებმა სკოლის შესასვლელში სიყვარულის ისრები დაარიგეს.aA